WILLEMSTAD - Akademia Pedagógiko Kòrsou (APK) lo stòp di eksistí na Kòrsou.
Ku firmamentu di un kombenio ayera tardi, a formalisá integrashon di e dos institutonan di formashon pa maestro di skol ku ta APK i e formashon nobo ku a kuminsá na Universidat Nashonal di Antia.
Pa direktiva di IPSO ku durante hopi aña a manehá APK, a firma su presidente Charlie de Haseth, pa UNA a firma Hugo de França. Diputado Marilyn Alcalá-Wallé, kende a firma pa gobièrnu insular di Kòrsou a ekspresá su satisfakshon pa e hecho ku despues di un periodo di intrankilidat, awor tin e klaridat nesesario pa esun ku ke sigui su karera komo edukador.
Manera ta konosí, dia a sali na kla ku UNA ta bai kuminsá ku formashon di maestro, a surgi hopi konsternashon bou di tantu personal komo studiantenan di APK. Tur tabata konsiderá esaki un menasa pa nan eksistensia. Tabatin den pasado asta akshon di parti di studiantenan sostené pa e dosentenan.
Gobièrnu di Kòrsou, segun diputado Alcalá-Wallé a bisa aña pasá ku lo bini un solo instituto pa formashon di maestro. Nos a bisa tambe ku nos lo traha riba kalidat, el a bisa.
Aña pasá a kuminsá ku e trayekto aki, a firma un Memorandum of Understanding pero esaki a kousa sierto konsternashon.
Hustamente pa e motibu ei mes gobièrnu a disidí ku ta bai traha intensivamente riba un trayekto di integrashon, segun e diputado a trese dilanti.
Den promé instansia a forma un grupo di trabou, pero gobièrnu a konstatá despues di tempu ku esaki no tabata funshonando i a disidí di lanta e ora ei un komishon konsistiendo di entre otro Charlie Do Rego komo presidente (Do Rego mes tabata dosente ántes na Akademia Pedagógiko Kòrsou), Sixto “Chito” Wallé ku tin eksperensia vasto den enseñansa i ku durante hopi aña a funshoná den Direktiva di Skolnan Katóliko, señora Echteld di UNA i tambe señora de Freitas ku tabata enkargá ku e sekretariado.
Di parti di gobièrnu tabatin den e komishon Jubert “Yubi” Evertsz, kende tambe tin hopi aña di eksperensia den enseñansa i kende tambe ta eks dosente di APK.
Ku firmamentu di e kombenio ayera tardi, de fakto a kuminsá realmente ku e proseso di integrashon di e dos institutonan di formashon.
Entrante aña eskolar 2008-2009, lo no tin dos instituto mas, asina diputado Alcalá-Wallé a anunsiá.
Esaki ta nifiká den práktika, ku tur studiante ku entrante e aña eskolar nobo kuminsá studia pa maestro di skol, outomátikamente ta bira studiante di UNA. Esei ta konta tambe pa studiantenan ku ya kaba a inskribí na Akademia Pedagógiko Kòrsou.
Pa e studiantenan ku ta studiando kaba na APK, lo no tin kambio. Nan lo sigui ku nan estudio i nan lo sigui kai bou di APK. Pa loke ta e studiantenan di e formashon di maestro na UNA, pa e grupo aki tampoko e kombenio tin konsekuensia.
E dosentenan ku awor aki ta empleá na Akademia Pedagógiko Kòrsou, lo pasa pa e Fakultat General di Universidat Nashonal di Antia.
Ainda mester regla e aspekto finansiero: ta e intenshon pa promé ku e aña nobo di formashon di maestro Konseho Insular tuma un desishon al respekto.