Si nos no ta pagando kaba p’e, nos lo bai paga sigur sigur den futuro serka òf mas leu pa e profundo falta di union ku yunan di Kòrsou real tin.
Un falta profundo di union ku bo ta nota hopi kaminda i ku te na ora hasi manera ku e t’ei, tòg ta lanta ken ku ta fuerte asina pa mustra ku no tin union i dikon no mester tin.
Ta bèrdat, tin gruponan den komunidat ku ta realmente uní basá riba nan interesnan personal. Pero mayoria hende ta aparentá di no tin e noshon pakiko no mester bringa otro i pakiko mester ta un, pa yuda nos komunidat i di mes e ora ei tur hende den nos komunidat.

E falta di union ta bai kompañá tambe ku un falta di rèspèt pa nos mes. Komo ku hopi hende no ta sinti ku nan ta parti di loke ta nesesario pa e otro e no ta mira tampoko pakiko e tin di duna rèspèt na e otro yu di Kòrsou.
Esaki atrobe ta pone ku hopi yu di Kòrsou ku korektamente a yega na posishonnan klave mester atendé ku yunan di Kòrsou ku pa kolmo supkonsientemente ta sali pa stroba e otro yu di Kòrsou ku a hasi esfuerso pa yega kaminda e ta; ta keda sin dun’é e sosten ku e mester i ta hasi tur esfuerso pa demostr’é ku no tin intenshon tampoko pa dun’é rèspèt; ni sikiera e rèspèt normal ku nos tur mester tin pa otro, sin ta importá ken e hende ta.

Mi ta spera ku bo ta trata na bisa ku mi no tin rason. I ku bo por komprobámi esei. Pasobra esei lo ta bon. Pero e ehèmpelnan tantísimo di kon nos mes ta ku nos mes, ta asina muchu ku nos mester bai traha riba e konsientisashon di nos hendenan riba e pakiko ku nos mester hasi kos huntu. Prepará huntu pa e kambionan benidero impaktante den nos struktura estatal. Kana huntu pa plania kon nos lo por saka mihó benefisio pa nos kada un den e pais nobo. Aseptá huntu, ku nos mester para uní kontra di tur otro ku ta kontra di nos chènsnan bon pendiente. I riska huntu, pa nos tuma mihó desishonnan posibel, awor aki i pa mas despues.

E bromamentu di ken nos ta, ku nos ta un pueblo multi tur kos ‘huntu’, pero di tantu desendensia i nashonalidat, ta aksentuá mas nos falta di union ku e ta yuda pa nos ta uní. Mas ainda, e bromamentu ei ta keda duna chèns na tur ku bin aki pa keda su mes i nunka integrá ni asimilá pa forma e pueblo diverso, ku similaridatnan pero ku diferente rais. Nos mes, mi ta spera ku ta sin sá, ta pèrmití e falta di union kada dia ku nos pèrmití un hende ku bin buska mihó porvenir aki keda ku tur loke e pais ku el a bandoná, bin aki keda broma ku loke e tin pero ku no t’aki. E ta keda bisa ken e ta sin ta na su lugá pero aki. E ta keda papia di kon bon i mihó loke el a bandoná ta. I e ta keda hasi manera nada aki no ta bon ku eksepshon di benefishinan sosial i oportunidatnan ku nos mes hendenan ta benta den su skochi.

Nos ta pagando kaba mihó bisá pa e echo ku nos no tin union. I ku ora tin kos bon ta e bromamentu di nos mes ta yuda pa loke por tabata realmente mihó di nos bai pa otronan.
Union real lo sòru pa tur hende ku nan mes punto di bista tuma desishon pa hasi loke ta bon pa nan na Kòrsou; hendenan di afó ku tambe ke traha i sin esnan ku ta aki, pa saka solamente, loke ta benefisiá nan so. Ki dia nos ta pone reglanan pa obligá nan bira di bèrdat unu ku nos, uni ku nos, pasobra nos mester di nan pa duna man aki, pero solamente huntu, den union di bèrdat ku nos i nos benefishinan.

Union di yu Kòrsou ta bai bini ora hende di aki ta konsiente i komprondé ku ta ora nos sa e motibu pakiko nos mester uni, nos kada un ta bai tuma mihó desishon pa por benefisiá di loke kada un di nos meresé. Sin union nos ta bai paga un preis demasiado haltu i kisas mas lihé ku hopi lo imaginá.

Bon siman i lesa mi blòg riba www.notabel.com.
Por komuniká ku Reyna Joe na info@notabel.com.