Mi ta kòrda novèmber 15 aña pasá, tempu ku tabata hasiendo gestionnan pa lanta Partido Antia Restrukturá. Ounke tur esnan presente tabatin mil i un motibu personal pakiko nan kier a drenta polítika (bèk), tur tabata uni den un solo pensamentu polítiko: kon kibra e poder polítiko di Partido Nashonal di Pueblo, ku e tempu ei, dirigí pa señora Maria Liberia-Peters, tabatin e poder polítiko kasi apsoluto na Kòrsou.

Prinsipalmente despues di e referèndem di ’93, ora ku e órden polítiko na mando e tempu ei a mustra bon kla, ku no tabata nan intenshon pa duna kontenido na e deseo di pueblo di Kòrsou pa e islanan antiano keda huntu den Antia di 5. “Referèndem ta referèndem, elekshon ta elekshon” tabata e kontesta di señora Liberia-Peters kada biaha ku prensa puntr’é si e lo “respetá” resultado di e referèndem ei. Pues ku otro palabra, Partido Nashonal tabata e “nemesis” polítiko di PAR. E “enemigu” ku PAR a usa semper komo referensha pa mustra kon diferente e si ta for di “polítika tradishonal”.

E enemistat polítiko aki a perdurá te na 1998, kulminando den pitu di elekshon ku un kaso den korte di hustisia ku lider polítiko di Nashonal di e tempu ei, señora Suzy Camelia-Römer a entamá kontra PAR, pasobra PAR a referí na su persona den un spòt di televishon ku el a “sufri” un kantidat di skandal tempu e tabata minister di Hustisia.

Djis un aña despues a yega un fin abrupto na e enemistat aki. PAR i Nashonal a forma un koalishon huntu i pa sorpresa di amigu i enemigu, a bira e aliado polítiko di mas fuerte ku PAR por a deseá. Tur e gabinetenan formá pa PAR ku a sigui, Pourier III, Ys I. Ys II i De Jongh- Elhage I a konta ku partisipashon leal di Nashonal. Remarkabel ta ku mas fuerte e lasonan entre PAR i Nashonal a bira, mas i mas e partido bèrdè a keda bai atras na voto. Hasta na dado momento tabata mustra ku e partido a pèrdè su propio bos polítiko. Kada biaha ku nan a sali den publisidat ta pa suprayá un pensamentu polítiko di PAR òf pa sostené maneho konsipiá òf propagá pa PAR. Ta masha poko biaha den nos historia polítiko a yega di sosodé ku un partido polítiko a pèrdè su identidat di e forma ku Nashonal tabata pèrdè esun di dje, djis pasobra nan ta bou di sombra un otro partido polítiko. Pa kolmo un partido polítiko ku a lanta “a kousa” di dje.

Pero no mas! Aparentemente liderazgo di e partido bèrdè ta lantando for di e soño letárgiko ku nan ta den i ta realisando ku sigui drumi bou di sombra di PAR lo nifiká fin di eksistensia di e partido. Partido Nashonal di Pueblo, ku semper tabata na vanguardia di outonomia interno di e islanan antiano, sigur esun di Kòrsou. De fakto, e úniko diferensha entre e posishon di PAR (Pro Antia Restrukturá!) i Partido Nashonal den e referèndem di 93 tabata union di e islanan antiano versus status outónomo pa Kòrsou. Pasobra tantu PAR komo Nashonal tabata boga pa e mesun kos: E OUTONOMIA INTERNO SAGRADO DI KÒRSOU. PAR a mir’é mihó defendé si Kòrsou a keda den Antia, miéntras Nashonal a mir’é mihó protehá den un Kòrsou outónomo den Reino.

E ‘keskes” resien entre lider di Nashonal i dos diputado di PAR ta e promé tirunan di kañon den un intento di Nashonal pa libra su mes di e “pispis” di PAR. Un poko lat i un poko ònbeskòp, pero mihó lat ku nunka. Den tur e “gedonder” rondó di ‘slotverklaring” i e proseso pa Kòrsou haña su status outónomo mester sali un bos moderá pa splika pueblo ku no ta tur kos ta drai rònt di un saku di plaka manera PAR ke laga mustra. Pero ku kualke pueblo ku ta respetá su mes, mester lucha pa su outonomia i para manera un blòki betòn kontra kualke intento pa tòrnu na dje. I laga nos ta franko. E manera di shouru kon Ulanda ta tòrnu na esaki a kuminsá pasa e límite di loke ta aseptabel. PAR mester realisá ku plaka no ta kos. “Bienestar” hamas por bai a kosto di outonomia. Pasobra bienestar na rudia ta manera un flor riba un kadaver. Danki Dios Nashonal ta realisando esaki!

Te otro siman ku poder di Dios

(Manda bo komentario, opinion òf krítika riba e kolumna aki na; bobharms1@gmail.com)