Prof. dr. Lorito ta yama tur hende un felis djabièrnè. Un pabien awe na tur para ku ta ku penshun. Pa nos amigunan penshonado den prensa tambe ta bai un saludo i nan ta hopi: Ronny, Orlando, Paul, Carlos, Maria, Signa, Cedric, Elvin, Mem ta bai un saludo. Na otro penshonadonan manera Eric, Sonia, Morris, Stanley etc. tambe un saludo!
*********
Nos a tende último dianan masha komentario riba e kaso den Nieuwe Straat. E kaso ta den investigashon i Kabuya ta detené. E kos ku nos no a komprondé ta, ku tin informashon ku ta un krùk di bar a usa pa lastimá e víktima kuné. Pero ketu bai tin medio ta insistí pa papia di piedra i klenku. Es mas, na Ulanda nan a bisa klaramente ‘stenegooier gearresteerd”. Nos tin ku warda awor te ora tin un kaso den korte pa nos tende kiko ta kiko. Nos a komprondé, ku e víktima mes a indiká, ku su pèchi di Boston a keda tur kibrá pa motibu di e akto aki.
*********
Papiando di Boston, yen di hende nervioso e fin di siman aki pasobra Boston ta bai topa Yankees. Nos amigunan aya no ke tende nada malu di nan ekipo. Nan tabata den un proseso di duele nashonal, na momentu ku kosnan no tabata bayendo bon ku nan. Nan tabata skonde pa no komentá nada. Bo mester tende nan awe: nan tin e boka mas grandi atrobe. Ta di kon hende mester t’asina?
*********
Bo ta mira tur biaha ku den mundu internashonal hendenan ta demostrá nan grandesa. Si bo tuma nota ku Hugo Chávez a duna Rei di Spaña un man, bo ta komprondé, ku aki ta un kos grandi a pasa. Ken no ta kòrda ku Rei Juan Carlos a manda Chávez sera su boca. “Por que no ta calles!” a zona rònt mundu i te awe ta un di e filmashonnan mas gustá riba youtube.com
*********
Un di e donnan mas grandi di hende ta pa pordoná. Pero un di e donnan mas grandi ta tambe ku ora bo pordoná, bo no ta bolbe akusá i trese e mesun kos dilanti ku bo a kaba di pordoná. Hopi hende no tin e abilidat aki. Ta esei ta pone ku tin hopi hende amargá ta kana rònt. Pordoná i ta pordoná i nada otro! Si bo no por pordoná sin lubidá, simplemente no pordoná!
*********
Papiando di don Barack Obama a hasi masha impreshon ku su gira internashonal. Nos a mir’é ayera dilanti di 200 mil hende na Berlin i e tabata mustra hopi presidensial. Si bo tuma nota ku latinonan ta bisando pa 75 porshento ku nan lo vota pa Obama, anto ya bo sa kaba, ta den ki direkshon e elekshon di dia 4 di novèmber awor ta bai. Hasta republikanonan a kuminsá atmití, ounke kuchikuchi, ku no tin awa pa laba!
*********
Dios laga Obama no hañ’é ku mas kontroversia manera den e promé lunanan di e anda aki. Obama bou di preshon ta un otro hende, ounke últimamente e ta dil mas mihó ku e tipo di kosnan aki. Un poko straño ku nos no ta tende masha mas di Hillary. Por ta a disidí pa laga Hillary (i Bill) pa loke nan ta?
*********
Un hòmber fuma a anunsiá, ku tin un bòm na bordo di un avion di Insel Air i el a kere ku ta djis un chiste pa por lag’é den libertat atrobe. Awèl, polis a kue duru tene. Si nos ta Insel Air, nos lo lag’é bin landá for di Islariba! No ta sistema! A bira tempu pa kompanianan atendé e asuntu aki di hendenan fuma na bordo!
*********
E kaso na Curoil ta bai haña un rabu largu. Un kos so Lorito ke sa: di kon a dura asina tantu pa tur hende kuerdo ku ta paden i pafó di e kompania, haña sa ta kiko tabata pasando realmente? Unda e kòntròlnan intensivo a keda. Anto e komisarionan i diputado (anterior) tabata na soño? Dos aña e kos aki tabata kanando kaba. Lebumai nos! Te mañan ku Dios su poder!