Skina di Sorti, awe djasabra 26 di yüli di 2008, ta kuminsá ku deseá tur hende un bon dia. Tin kosnan ku pa nan implikashon riba kalidat di funshonamentu di un estado di derecho t’asina fundamental, ku nan mester wòrdu atendé ku e koutela nesesario. Esei tantu di parti di gobièrnu komo di un miembro di kalke kuerpo representativo. Nan ta hura di kuida, protehá i mantené e órden estatal. Nan tur mester ta konsiente ku den nan funshon nan tin di wak no solamente kiko tin di wòrdu hasí, pero kon e ta wòrdu hasí.
****
Den un sistema di gobernashon demokrátiko, kaminda e prinsipio di partisipashon ta karga e mayó piso di importansia, aktornan den e sistema di gobernashon mester ta konsiente ku kontrali na un debate katedrátiko no ta bai pa kende tin rason, pero kende tin mas sosten popular, pero ku e anotashon ku e aktor mester ta den kuadro di lokual reglanan establesé (skirbi i no skirbi) ta pèrmití. Hende pa por biba komo komunidat ta biba enkuadrá (“boundary system”).
****
Pa basta tempu kaba “de politiek” ta violando e prinsipio básiko aki ku aktuashon ku a bini ta debilitá e papel ku gobièrnu, Parlamento, Konseho Insular i Bestuurscollege tin denter di e sistema di gobernashon demokrátiko. E “onderlinge bejegening” ku frekuensia te hasta ta bou di tur nivel di komportashon síviko. Lokual tin ta mas bien un parodia riba lokual ta ser yama “parliamentary procedures”. Ta manera kos ku sala di Parlamento, Konseho Insular i media a bira e plataforma pa reunion di kontakto polítiko.
****
E lider di frakshon di DP, Norbert George, den su promé inkurshon komo miembro di un kuerpo representativo, a hasi su mes un mal fabor ku un aserkamentu ku a hasi’é un polítiko kontroversial. Polítikamente esei ta tradusí su mes den deterioro den reseptividat pa su mensahenan. Su persona ta bira opheto di eskrutiño en bes di kontenido di su mensahe. Banda di esei, e ta pèrdè e kuadro general i e peso di sierto institushonnan for di bista. Ta p’esei hopi biaha e manera ku e ta atendé sierto kosnan no ta esun mas indiká.
****
Pero gobièrnu ta totalmente inkorekto ora ku e ta tilda miembro di Konseho Insular, Norbert George, Lider polítiko di DP ta fuera di lugá den su posishon di no ta konforme ku e konseho di Raad van Advies. Gobièrnu mes ta hiba di kustumber di no bai di akuerdo ku tur konseho di Raad van Advies riba proposishonnan di lei ku Gobièrnu presentá. Meskos ku gobièrnu tur hende ta den nan derechi di tuma e konseho di Raad van Advies komo konseho ku e no tin mester di ta di akuerdo kuné.
****
Konstelashon di Raad van Advies ta sirbi pa duna e konseho peso i e peso ta deteriorá na momentu ku e konstelashon tin miembro ku pa nan otro posishonnan ta laga espasio pa konflikto di interes. Si vise presidente profesor Frank Kunneman ta miembro di RvC di MCB,i di RvC van Aqualectra i komo partner di VanEps Kunneman VanDoorne ta mantené un relashon komersial ku gobièrnu i tambe ta wes suplente, e mas ku kualke otro mester sa ku e ta afektá integridat di konseheronan di Raad van Advies.
****
“Onafhankelijkheid van het orgaan” ta posibel ora ku “Elke vorm en schijn van belangenverstrengeling van de leden van het orgaan wordt vermeden. Voorkomen wordt dat medewerkers naast de primaire overheidsfunctie andere functies vervullen die kunnen leiden tot belangenverstrengeling en daarmee een risico vormen voor de onafhankelijke oordeelsvorming van medewerkers”.
****
Banda di esei mi ke atvertí pa un pretenshon totalmente robes ku demokrasia ta funshoná únikamente via i basa riba e institutonan ofisial i prosesonan formal. Nan tei komo base, pero nivel di demokrasia ta pober si ta únikamente e prosesonan formal i bos di e institutonan ta esnan ku ta determiná desishon ku ta wòrdu tuma den un pais. E prinsipio di “government for the people and by the people” ta eksigí lokual nan ta yama het “politiek en publieke debat” na nivel.
****
Mi ke bolbe sita for di opservashonnan hopi skèrpi di vise presidente di Raad van State riba funshonamentu di demokrasia na Ulanda, ku ta riba un nivel mas avansá ku esun di nos. "Democratie is meer dan democratie via staatsinstellingen. Ook op andere wijze dan via verkiezingen moeten burgers zich bij de publieke zaak betrokken weten en zich daarvoor verantwoordelijk voelen. De legitimatie van de staat hangt ook af van de wijze waarop wordt omgegaan met maatschappelijke instituties. Een hernieuwd doordenken van plaats en betekenis van onze maatschappelijke instituties is nodig."
****
Nos ta kanando den direkshon kontrali. Den afan pa defendé posishon tumá i kompromisonan (por sierto ku implikashon hopi grandi pa komunidat) hasí riba kabes di komunidat konstantemente ta kriminalisá kasi tur hende ku no ta konforme ku konsehonan ku gobièrnu ta sigui òf ta usa pa sostené su posishon. En bes di amplia e bista nos ke límite na un grupito ku ta wòrdu pone riba un pedestal.
****
Outonomia no ta meramente un kestion di kuadro hurídiko i finansiero. E ta mas un asuntu di “belevenis” a base di un nivel mental. E ta mas un kestion di filosofia di bida. Kuadro hurídiko i finansa ta instrumento pa yega na espasio pa e “belevenis” ta mas optimal. Tin un diferensia fundamental entre ser un esklabo i ta sklavisá. E promé ta mas mental (un adikto ta un esklabo) e otro ta kestion di imponé riba un otro dor di hasi mal uso posishon di poder.
****
Un independentista ta sinti (“belevenis”) vários di e areglonan ku ta den proseso pa bira dekreto otro for di esnan ku ta duna kosnan di término sumamente korto (“deficiency needs”) un peso mas grandi den nan filosofia di bida. Konseho di Raad van Advies riba e aspekto hurídiko no ta sufisiente pa yega na un posishon balansa riba e kuestion di impakto di sierto areglonan riba outonomia.
****
Si e hóben Norbert George no a daña su reseptividat den komunidat ku postura poko kontraversial den su inkurshon polítiko, e lo por a sirbi komo un bon kontrabalansa den un debate “one sided” i “bekrompen” riba e proseso estatal (pasobra e debate ta delimitá pa kuadronan imponé en bes di otro asuntunan ku ta importante).
****
Norbert George ta inteligente, i sin miedu pa kana otro avenidanan. E mester skohe si entre ser polítiko (lokual ta rekerí di un aserkamentu mas disiplina) òf keda un aktivista (tin bia e ta parse un “rebel without a cause”). Norbert George mester asumí un postura poko modesto, para ku su pianan mas meimei dje komunidat i desaroyá mas i mihó reseptividat. Su problema kontrali na gran parti di e elenko no ta e kontenido pero e manera ku e ta trese su kosnan.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.