Prof. dr. Lorito ta yama tur hende un felis siman. Nos ta deseá prof. Prikichi tambe un felis regreso.
****
Kòrsou tabata di fiesta djasabra anochi despues ku nos selekshon di Little League a bira kampion un biaha mas. Masha selebrashon tabatin tur kaminda. Un kos ku nos a gusta ta ku tur kaminda yunan di tera tabata brasa otro i deseá otro pabien. Deporte un biaha mas a demostrá ku e ta un arma importante pa krea un nashon. Ta mayoria di nos polítikonan di turno i empresanan ku por duna un man i no ta hasi esei, so no a ripará ainda! Pabien na Vernon i su muchanan pa trese tantu alegria, pas i union.
****
Dia pa dia nos ta haña mas duele di Andruw. Awor nan ta ekspresando duda si e lo bin bèk e temporada aki. Don Mattingly a bisa awe den Los Angeles Times ku e ta spera ku Andruw por rekuperá. “Andruw Jones can be salvaged, making him either an optimist or a dreamer”. E frase ei so ta bisa tur kos. Lorito ta kere ku ta un remedi so tin: bin Kòrsou, train ku un par di mucha di Little League, basha firma tur kaminda i kumindá/hari ku tur hende. Esei ta e reseta di Lorito pa sigui dal bai. Kere nos ku e lo yuda sigur!
****
E kaso di Curoil ta sigui hala atenshon. Maske kuantu ku gerensia trata di splika, ta surgiendo mas pregunta. E kos mas malu ku gerensia a hasi ta saka un komunikado, bisando ku no ta kontestá otro preguntanan. No masha táktiko, pasobra ta e ora ei preguntanan ta bai surgi.
****
Tur hende sa ku nos no ta masha mirá den bista di Helmin (kere nos ku nos tampoko no sa pakiko!), pero el a hasi algun remarke ku sigur ta relevante den e kaso aki. I el a hasié den un forma hopi aseptabel kuestionando e kosnan ku mester kuestioná. Maske e ta haña nos korant “desastroso”, manera e mes sa bisa, nos ta sigui duna “cesar loke ta di cesar”. Nos ta spera e ta uni ku otronan pa nos haña sa delaster un detaye di e kaso aki! Nos ta interesá prinsipalmente den e aspekto di kòntròl interno i ta di kon awor numa a ripará!
****
Nelson tambe a papia riba e kaso i nos mester dun’é e benefisio ku alomenos Vantage a hasi diferente pregunta riba e kaso aki (no ta tur kos Nelson a i ta hasi malu!). Nos úniko interogatorio ta, ta kon ta awor nos a haña sa ku Vantage tambe tabatin duda. Bisa nos esei awor aki despues di un aña i mei pa dos aña no ta yuda nos ku nada!
****
Nèt awor ku Aldrich a kita for di gobièrnu bai Curoil, e promé tèst a bin pa Curoil. Nos konosé Aldrich i nos sa ku e por hasi un bon trabou pa minimalisá e daño na e kompania. Nos a mira e direktor for di awe mainta tempran na BC. Parse ku diputado a yega for di Cuba (makutu yen di enfermero), i mesora el a konvoká un reunion pa papia riba e asuntu. Ban wak kiko tei sali afó!
****
Parse ku ora e kònsùl nobo di Venezuela yega na kualke aktividat, sakadónan di pòrtrèt ta basha flèsh pisá riba dje. Lorito a puntra kiko ta pasando i nos a haña sa ku parse ku e dama kònsùl nobo ta totalmente diferente ku su predesesor den tur sentido di palabra. Lorenzo no tabata e hòmber mas “guapo” ku Venezuela a produsí pero t’e tabatei pa largu tempu. Chávez a disidí ku ta mihó e manda un “bon” representante den tur sentido di palabra, tantu den formashon/edukashon komo aspekto físiko pa nos. Bonbiní, sra. Kònsùl! Laga Lorito sa sikiera ta kon sra. su nòmber dilanti ta! Mañan nos lo tin un pòrtrèt (di ariba te abou!). Nos ta spera ku nos Lorito no krea un krísis diplomátiko!
****
Nos ta keda te aki awe. Lorito i Prikichi tur dos ta bula, ke men sea alèrta! Te mañan ku Dios su poder!