Skina di Sorti, awe djaluna 28 di yüli 2008, ta kuminsá ku deseá un i tur un bon dia. Pa bo por ehersé bo funshon ku sierto grado di éksito, bo mester ta konsiente di kiko e sektor ku bo ta operá den dje ta kome i bebe. Bo no tin nodi ta un studioso (un persona ku ta investigá e fenómeno ku e pretenshon di krea i òf amplia konosementu general riba e fenómeno) pero reglanan básiko si no por ta un enigma pa bo.
****
Opservando e akshonamentu di aktornan polítiko e konklushon ta ku un grupo remarkablemente grandi di polítiko aktivo, ta akshoná pa “please” un òf mas figura (ku nan ta someté nan mes na dje), i konsekuentemente ta degradá entre otro e kuerponan respresentativo den plataforma di deterioro di e sistema di gobernashon demokrátiko. Un miembro di Konseho Insular ku ta kontestá pregunta dirigí na diputado, ta insólito. Diputado ta obligá di duna kuenta i rason na Konseho Insular.
****
Miembronan di Konseho Insular, sea ta di oposishon òf di koalishon mester mantené fundamentu di e prinsipio di e sistema na haltu. Un miembro di Konseho Insular ku ta intervení entre e diputado i Konseho Insular, ta duna muestra di falta di konosementu i abilidat pa hunga e wega polítiko. Un polítiko ku a hinka esfuerso pa siña ta kon e wega ta wòrdu hungá, sa ku e kaminda indiká pa yuda bo diputado ta di hasié pregunta ku ta habri kaminda pa e debate por drenta e área kaminda e diputado ta fuerte.
****
Un diputado ku a hinka tempu pa siña e wega polítiko (den bon sentido di e konsepto wega, ku ta “samenspel van regels, gewoontes, taktische zetten, etc”) mester sa ku komo diputado ku amplia espasio pa hiba palabra i finalmente e último palabra (e ta kontestá despues ku miembro a hasi pregunta) por pone e énfasis kaminda e ke i finalmente por bini ku e remarkenan final ku e ke pa keda kologá.
****
Otro ora bo ta mira konfrontashon ku no tin ningun sentido. Tin rivalidat polítiko ku rashonalmente no ta sirbi ningun propósito. Rivalidat tin sentido ora ku un òf mas aktor tin e mesun grupo komo “target”. Mensahe ku no tin impakto riba e grupo ei i aktornan ku no ta interesante den bista dje grupo, no ta relevante pa reakshoná riba dje. Ataka un aktor ku e ophetivo pa redusí su posibel votonan tin sentido únikamente si e atake no debilitá bo propio posishon.
****
Ta p’esei, e atakenan ku for di oposishon ku ta bai den direkshon di partidonan di koalishon (ku PAR komo “target” prinsipal) no tin sentido miéntras e atakantenan no profilá un alternativa di gobernashon. E úniko grupo ku no tin mester di presentá un alternativa di gobernashon pa e tin outoridat moral pa kuestioná i krítika ta e mobilisadornan no polítiko. Polítiko no t’ei pa “waarheidsvinding” pero pa yega na alternativa pa mehorá nivel di bida di e komunidat.
****
E bon polítiko no solamente ta krea e persepshon di ta un alternativa, pero ta akshoná pa yega na realisashon di lokual e ta pretendé. “Good politicians deliver on promises”. Pues kritiká i lamentá en bes di krea e posibilidat pa yega na forma parti di un koalishon pa goberná tambe ta mal polítika.
****
Mañan mi ta bai profundisá mas riba e kestion di “good politicians” aki.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.