Lorito ta yama tur hende un felis djamars. Fakansi di skol ya kaba ta den su fase final i e lorititonan tur ta lamentá ku dianan di skol ta serka. Nos a bisa nan ku t’asina mester ta! Tin momentu di gosa i momentunan di traha serio.
*********
E kaso di Curoil a kue un buèlta dramátiko i Gobièrnu, komo doño, no a keda ku otro alternativa, sino di atendé e kaso aki ku diligensia i seriedat. Ta masha karta nos a haña di hendenan preokupá. Banda di esei tin tambe yen di konhetura ku mester dil ku nan promé ku nan hasi mas daño na e kompania. Na Kòrsou a para bira, ku ta ripití un mentira òf mitar bèrdat dje tantu ei, ku e ta bira bèrdat kompleto!
*********
Nos a haña un karta ku ta hasi diferente denunsia mas. Nos ta kere ku e hende ku a skibi e karta i a tuma e molèster, pero no a firm’é, lo hasi bon di bai entregá su denunsia na Ombudsman. Curoil ta kalifiká kompletamente den e trabounan di Fred Wiel. Nos a haña tambe un komunikado di MOPROKO (esta un nòmber mahos!), ku ta pidi un investigashon i pidi pueblo pa ta den estado di alerta. Un kos nos no ta komprondé, ta kon bin kada bes e gruponan aki mester papia di mobilisashon! Por atendé e kosnan aki di otro forma tòg?
*********
Nos a ripará, ku henter e kaso di Curoil a yega tambe prensa internashonal. Awe nan a informá nos ku Bunkerworldnews.com a informá di e kambionan na Curoil. Nos no a haña chèns pa subi riba e wepsait, komo ku mester bira miembro di e wepsait pa por subi riba dje.
*********
Tur kos awor ta den man di STIP i e hunta di komisario ku mester bai tuma desishonnan importante den e próksimo oranan. Lorito ta kere, ku e úniko kos ku por pasa ta, pa den e fase aktual no inkriminá niun hende. Lo ta bon pa hala sierto hendenan un banda un ratu pa un investigashon independiente (realmente independiente!) tuma lugá. Ban wak kiko ta bai pasa!
*********
Lorito a tende diputado Rhuggenaath papia ampliamente di diferente tema. Nos ta kere ku sigur Rhuggenaath tin un balor agregá pa polítika. Nos ta sinti ku e mes ta realisá, ku esei ta e kaso tambe si tuma nota di su último deklarashonnan. E ta formulá mas kouteloso i diplomátiko. No ta tur su ideanan nos ta kompartí, pero di tur manera e por defendé nan! Den polítika, esei ta un don importante.
*********
E hecho, ku el a despensá tambe na Chebu Sluis i su famia, si akaso el a lastimá nan, tambe ta un akto di grandesa. Kuantu nos ta lastimá un otro hende sin sikiera konsiderá un despensa. E ta bisa tur dia den nos tur su bida. Nos ta kere tambe, ku esei tabata e paso apropiá pa tuma. Nos ta spera tambe ku Sluis i Rhuggenaath lo haña oportunidat pa papia riba e kos aki den tur trankilidat.
*********
Por sierto ku Sluis ta representando Antia na e konferensha anual di ITU na Viena. Imaginábu: aki na Kòrsou nos ta hasi difísil i aya afó nan ta karga e hòmber te aya! Mundu riba su kabes!
*********
Lorito a tende ku un reportero konosí di radio a entregá su retiro ku forsa inmediato pa motibunan di “prinsipio”. Nos no a haña sa tur kos ainda, pero nos a komprondé, ku e kaso tin di aber ku e asuntu di un NV ku ta den hopi publisidat den último dianan. Bo mes sa, Lorito ta haña sa tur kos i nos lo sigui koba!
*********
Nos ta keda te aki awe. Awa ta manera menasá atrobe. Esei ta nesesario pa nos matanan, pero no pa e alanan di Lorito. Ban wak kon nos ta dil ku e kaso aki. Te mañn ku Dios su poder!