Skina di Sorti, awe djamars 29 di yüli di 2008, ta kuminsá ku deseá un i tur un bon dia. Un aktor polítiko mester tin e ambishon i pretenshon di ser un bon polítiko. Un oportunista ta interesá den probechá di oportunidat ku presentá. Su inkurshon den polítika konsekuentemente no tin ningun otro ophetivo ku di saka lo máksimo for di e oportunidatnan ku tin den e sektor polítiko.
****
Un aktor polítiko ku pretenshon di liderazgo su ambishon ta bai mas aya ku di ser un bon polítiko i òf un bon gobernante. E ta aspirá di ta esun ku ta hiba pais na un nivel di bida mas mihó. E pretendiente ku ademas tin vishon di gobernashon ta hasi esfuerso pa gana e masa su tras den lokual mi a kalifiká komo un mishon pa un mundu nobo i mihó ( “journey of discovery”).
****
Den un intervenshon na studiantenan di Chinese University of Hong Kong ,Chief Executive Donald Tsang Today, a duna un definishon di lider pa lokual ta e sektor komersial ku ta bisa: ”A leader is responsible for giving direction, resolving issues, hunting for capable people, and motivating those under his charge. The Chief Executive is a rather unglamorous and down-to-earth job”.
****
Opviamente e definishon aki no ta aplikabel pa liderazgo den e sektor polítiko. Den e sektor aki, aspektonan sosio sikológiko (e interkambio entre elektorado, fasilitadornan, mobilisantenan i e aktornan polítiko) ta impaktá e fakultat pa rasoná (nan ta kondishoná direkshon i prioridatnan) miéntras lucha pa poder ta interrelato ku e aspekto di “resolving issues” (aki mi ker men esnan no polítiko).
****
Komo ku aspektonan sosio sikológiko tin un impakto asina grandi den e kuadro di liderazgo polítiko, e konsekuensia lógiko ta ku “glamour” (“allure, charm, appeal”) ta okupá un lugá muchu mas prominente den bida dje lider polítiko. Esaki ta un di e motibunan ku den polítika tin mas desviashon for di aserkamentu metódiko ku den sektor komersial.
****
Donald Tsang den su intervenshon ta trese ku:"No leader will ever achieve anything if the aim is to pursue personal success and glory before achieving results in work." Un “waarheid als een koe” ku den práktika polítiko na Kòrsou e mayoria ta pèrdè for di bista. E aspekto di “show”, krea i kuidamentu di imágen ta dominá, miéntras e aspekto di “achieving results in work” ta por lo muy ménos supordiná.
****
Mi a bini ta splika ku e aspekto di desaroyo mental ta e fundamentu pa yega na progreso real. Un persona ku tin ambishon sano (“need for achievement”) tin mas resistensia (“weerbaarheid”) kontra di e impakto di aspektonan sosio sikológiko ku un persona ku ta mas pegá ku nesesidatnan karnal (“deficiency needs”). P’esei un komunidat kaminda lidernan di e sektor komersial ta lèn mas pa e aspekto di “show, glamour” tin un problema serio pa lokual ta maneho sosio kultural.
****
Ta p’esei serka nos, introdukshon di e konsepto “fulltime” den polítiko no a kondusí na un inyekshon di kalidat di liderazgo den polítika. Mayoria di esnan ku a bini for di e sektor komersial no a resultá un balor agregá pa e práktika gubernamental polítiko. Nan no a inyektá e ambishon pa hiba un aserkamentu metódiko pero mas bien a entrega nan mes na e “show,glamour” di e kultura polítiko.
****
Mr. Tsang a bisa otro bèrdat sunú ku e siguiente ponensia: ”a talented businessperson can be a good political leader if he understands the logic of politics. A politician must put words into action to live up to their promises, and never ignore the policy making process as both it and the result is equally important. If the process is ignored, he said, the community might not be able to form a consensus on government policies, which then cannot be implemented, however sound they may be”.
****
Básikamente ta lokual mi a bini ta splika enkuanto e dos kuadronan ku ta interrelato ku otro den gobernashon polítiko ku ta e aspekto gubernamental (“policy making process”) komo e aspekto polítiko (gana sosten di e masa). E proseso di gobernashon polítiko tin su lógika i bo mester por lo muy ménos sa di dje pa por operá éksitosamente den dje (aki mi no ta referí na e oportunista, ku manera mi a indiká tei djis pa saka benefisio propio).
****
Un aktor polítiko no tin nodi di ta un studioso di e materia (pues e pretenshon di amplia i òf krea konosementu), pero e mester sa ta kual ta e reglanan di wega i ta kon e wega ta wòrdu hungá. No únikamente e aspektonan formal pero mas ku tur kos ta kon esun informal ta kana. Polítika ta e arte di gana mas tantu hende posibel tras di bo ideanan i konsekuentemente e aspekto di enemistat no por ta nada otro komo un insidente indeseá.
****
Kreando enemigu òf fomentá enemistat no ta e kaminda ku ta kondusí na mas i mihó “draagvlak”. Manera Tsang korektamente ta trese den su intervenshon:”It takes high effort to form a consensus when formulating policies, and politicians must go out and liaise with the people to better understand their views and communicate personal views to them”. Un siñansa ku aparentemente e mayoria den nos elenko polítiko no a hasi di nan.
****
Un otro aspekto ku spesialmente algun hóben katedrátiko ku a hasi inkurshon denter di e sektor polítiko ta siegu pe ta ku komunikashon ku e masa no ta kestion di disertashon pa un elenko profeshonal, pero un kestion di krea i mantené e persepshon di ta un alternativa pa solushon di inkomodidat di e masa.
****
Tsang ta trese e aspekto aki bunita: "Public policies are not only about charts, figures and dry scientific arguments. They are also about social beliefs and values, so political communication works to combine them. If we know people's fears or what they may accept, we can make appropriate adjustments when formulating policies and therefore remove obstacles to implementation."
****
Mi a trese na algun okashon ku mayoria di aktornan polítiko ta kometé “electoral fraud”. Nan ta krea persepshon ku no solamente nan no ta kumpli pero te hasta no ta akshoná konforme di e persepshon kreá. Tsang:”politicians cannot rely solely on showmanship to accomplish anything, and those who are good communicators must also demonstrate their sincerity by getting down to work to achieve what they have promised”.
****
Ta un aspekto ku FOL a paga duru pe den e último elekshon i tin di paga debido kuenta kuné den e próksimo elekshon. Elektorado su akshonamentu ta unu ku aktornan polítiko mester tuma ku mas seriedat. E ta hari su barika yen pa “show” pero ora di vota e aspekto di “konfiansa defroudá” tin un peso masha pisá mes. Ta dura pa konfiansa kaba, pero na momentu ku e kaba, mester kosnan hopi grandi pa rekobr’é.
****
Mi ta kaba ku e tema den e kolumna di djarason.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.