WILLEMSTAD / DEN HAAG – Uso di èkstra polis pa kontrolá papiamentu na telefòn selular tras di stür no a duna e resultadonan deseá ainda. Segun e bosero di Ministerio Públiko e kantidat di 19.600 prosèsverbal èkstra den e total di 110.000 for di tempu ku e prueba a kuminsá na sèptèmber aña pasá ta laga di deseá.
Ministerio Públiko ta konfirmá ku ta bin un investigashon pa haña sa kiko ta e kousa di e resultadonan pober. Kòntròl èkstra riba esnan ku no ta yama handsfree ta nesesario segun O.M. Anualmente tin 45 morto i mas o ménos 600 herido a konsekuensia di papiamentu na selular tras di stür. Banda di esaki tin tambe algun mil aksidente sin herido. Pa e motibu akí a introdusí e ‘anti-belpolitie’. Sifranan a mustra ku entre yüli 2007 te ku yüni 2008 polis a traha 107.600 prosèsverbal di 150 euro. Pa kompará: anualmente hustisia ta traha un kantidat di 120.000 prosèsverbal pa papiamentu na selular.
Aña pasá hustisia a kuminsá e ofensiva. E motibu tabata resultadonan di un investigashon ku e mustra ku 30% di outomobilistanan tabata yama sin handsfreeset. Kòntròl èkstra ku 30 polis i 20 motosaikel mester a oumentá e chèns di gara esnan ku kometé e infrakshon. E bosero di O.M., Koos Spee, a bisa ku te ainda e ta mira masha hopi hende mes ku telefòn den man. Miéntras e hendenan mester haña e sentimentu ku por gara nan. Esaki ta sosodé ora otro shofùrnan mira ku polis ta gara hopi outomobilista. Spee ta boga pa prolongá e periodo di prueba.