Prof. dr. Lorito ta yama tur hende un felis djarason. Na bankonan no tabatin masha moveshon ayera pero nan ta antisipá ku awe, mañan i prinsipalmente djabièrnè lo tin moveshon te bai. Ademas diferente negoshi ta spera di haña un bon boká relashoná ku apertura di aña eskolar nobo. Nos ta pidi nan si pa tene kompashon ku preis. Ta basta reklamo tin tur kaminda. Komo ku Lorito no tin ku bisti nos Lorititonan pa bai skol (djis habon so pa laba nan alanan) nos no ta ripará e oumentu di preis!
****
Nelson Pierre a skor awe mainta ku e forma ku el a trese su puntonan di bista dilanti na Z-86. Su puntonan ta relevante, aki aya skerpi i sarkástiko loke mester por, pero mas importante ta ku su mensahe sigur a yega. Nos a bisa na diferente okashon ku Nelson tabatin e oportunidat históriko pa trese kambionan importante pero finalmente e mester a sukumbí pa e mesun nètwèrknan ku el a trata di bringa.
****
Ora nos analisá Kòrsou di awe (i kere nos ku e kos aki ta duru pa bisa), nos no por yega na otro konklushon ku Kòrsou a bira di un generashon ku ta golos pa kos. Si bo mira kon hende ta pusha otro na nivelnan mas haltu, kon tin biaha ta traha ku èlebog pa hala e otro fo’i kaminda i kon materialismo ta prevalesé, anto bo no por yega na otro konklushon. Nelson tambe a bisa esei awe: nos a bira demasiado materialista.
****
Nelson komo sosiólogo a determiná kaba ku na Kòrsou tin manera un vírùs ku ta afektá tur esnan ku yega na sierto posishon. Hende ku a lanta pober i humilde awe ta hasi tur esfuerso i eventualmente bira bo enemigu pasobra bo ta stroba nan di haña e salario mas haltu na Kòrsou i tur otro benefisio manera un Mercedez, un BMW òf un Audi. Lorito di lebumai nos!
****
Awor ta Forsa Kòrsou a disidí ku ta bai evaluá tur loke a pasa últimamente rondó di Aliansa Patriótiko. Parse ku den e partido nan no ta masha kontentu ku un representante ku a bai reunion di e Aliansa a para grita “pueblo lanta pa nos kaba kos”. Henter e asuntu di Aliansa Patriótiko ta parse di bai kaba na aros i kiko.
****
Manera nos a bisa na diferente okashon, e hendenan ku ta malkontentu (i nan ta kresiendo!) mester haña un bos un kaminda. P’esei nos ta kere ku un Plataforma asina aki ta un masha bon idea pero no den e direkshon ku el a evolushoná. Mester kita tur punto skerpi i iresponsabel rondó di dje i sigui. Lorito lo a preferá di mira un òf mas di e partidonan di e Aliansa den un koperashon stratégiko pa duna Kòrsou un mihó posishon di negoshashon, entre otro den e proseso estatal. Nos ta kontentu ku ta trahando den e direkshon aki.
****
Nos a haña masha reklamo ku Gonzalo no tabata den e transmishon di beisbòl na Boneiru di TV 11. Tabatin reklamo tambe ku e narador ku si tabata presente a bin na slòf. A konsiderá esei un falta di rèspèt pa televidente. Lorito di lebumai nos!
****
Bo ta kere ku Chávez a manda 7 i 54 ayera. Chávez a kumpli 54 aña den luna 7 i awe hopi hende tabata masha felis ku 754. Tur aña di nobo Chávez ta duna tur hende ku kòrda riba su aña un bon boká. Nos tin un pregunta pa nos amigu Cesar: bo por bai wak na Tele-Korsou si tin e bolita 2 den e tómbolanan. Djasabra e bolita 2 a sali 2 biaha. For di e dia ei a sali 36 bolita i niun di nan no tabata number 2. Kon por ta? Por ta awe ta sali 2222.
****
Nos ta keda te aki awe. Kòrda ku nos tei pa kualke komentario riba loritotabula@yahoo.com Un saludo pa Bòchi ku a sugerí nos pa yama un di e kachónan: Salario òf Mínimo. Nos a hari bai gol. Nos a gusta e idea! Por sierto a sobra 6! Te mañan ku Dios su poder!