Skina di Sorti, awe djarason 30 di yüli di 2008, ta kuminsá ku deseá tur hende un bon dia. Den merkadeo nan ta papia di brinda e konsumidó un eksperensia ku ta surpasá su espektativa (“thrill the consumer or satisfy beyond expectation”) komo un ophetivo funshonal pa finalmente logra i mantené bentaha kompetitivo. Den polítika esaki tin di enserá ku aktornan polítiko mester forsa pa presta mihó ku e persepshon ku nan a krea serka elektorado. Esei kier men ku nan mester tene e sektor polítiko atraktivo den bista dje elektorado i finalmente presentá nan mes komo e mihó entre e alternativanan.
****
Den nos elenko polítiko tin un grupo grandi ku aparentemente ta sigui un otro lógika ku esun ku entre otro ami komo studioso dje fenómeno a desifrá. Apesar ku echonan ta proba ku nan akshonamentu no ta efektivo, nan ta pèrsistí ku nan manera di akshoná. Komo studioso di e materia indikashon optené for di komportashon di e aktornan den e blòkinan di influensia den e kuadro polítiko tin un peso mas haltu ku e lokual ta wòrdu bisá. Echonan (“forensic evidence”) tin un grado haltu di konfiabilidat serka e bon opservador.
****
Tin aktor polítiko ku ta den un fase avansá di ningamentu di realidat (e konosido fenómeno di “denial”). Nan a kuminsá kere e lokual nan a bini ta bisa pa konfundí otronan. Nan a konvertí su mes den un peliger pa nan alrededor. En bes di akshoná pa yega na e meta original bo ta mira ku defendementu di un posishon tuma ta bira un ophetivo apsoluto. Den nos realidat polítiko, tin algun aktor ku ta den e situashon menshoná.
****
No tin otro manera pa splika e situashon di kosnan inefektivo ku ta sosodé den nos práktika polítiko. Tantu den seno di koalishon komo den seno di oposishon tin akshonamentu ku bo por katalogá komo manifestashon di e realidat sosio polítiko, pero ku pa lokual ta e papel ku polítika tin di hunga den mehoramentu di kondishon general di bida den pais, simplemente un desperdisio di rekurso.
****
E fenómeno “electoral fraud” (engaño di elektorado dor di krea un persepshon durante di kampaña ku despues bo no ta kumpli kuné), entre otro a sosodé ku formashon dje aktual konstelashon gubernamental. E kestion di “botsende bestuursculturen” ku a bira aliado, serka fanatikada di e respektivo partidonan a wòrdu tragá te na momentu ku akshonamentu di e respektivo partnernan a kuminsá ta tacha kredibilidat di e otro. Te hasta tin kestion di transformashon notabel den profilamentu di algun aktor polítiko.
****
En bes di satisfasé “beyond expectation” bo tin kestion di defroudashon grandi di ekspektativa. Tin kestion na nivel insular di aktor polítiko ku a kue direkshon di machiavalismo. Ta trata di mantené e aparensia di ta íntegro, miéntras tras di e fachada ta práktika e polítika tradishonal ku a pretendé di ke kambia.
****
Tsang ku mi a referí den e kolumna di ayera na dje den su intervenshon riba gobernashon polítiko pa lokual ta e aspirashon ariba menshoná a bisa:"aspiring politicians must be people who hold onto virtues and values like justice, equality, freedom and democracy, and who have a mission to change society. This is what we call passion and sincerity."
****
Esei ta impliká ku un polítiko no por pretendé di ta “principieel” ku un akshonamentu ku ta kontra di “virtues and values like justice, equality, freedom and democracy”. Bo diferensiashon (posishonamentu ku ta distintivo ante otronan) únikamente por sosodé denter di e kuadro di balor i norma general di e filosofia di gobernashon demokrátiko.
****
Ser “principieel” ta kuminsá ku respetá i biba segun e filosofia di gobernashon demokrátiko. Por lo demas bo akshonamentu mester ta kuadro di e persepshon ku a krea ku palabra. Bo tin di kuminsá ku kumpli ku promesa hasí (persepshon krea) pa despues trata di surpasá e espektativanan kreá.
****
Tsang ta suprayá lokual mi a bini ta mustra riba dje finalisando su intervenshon ku: ”the ability to execute a policy is the key to successful, pragmatic leadership...the ability to deliver on his promises is one who understands well the relation between the major principles and specific details of each policy. A successful political leader is on top of every detail”.
****
Ku na nivel insular hopi kos no ta kana konforme e filosofia di gobernashon demokrátiko ta algu ku e lidernan di koalishon ku no ta forma parti di Bestuurscollege tin di preokupá seriamente kuné. Ta e aspekto di “a successful political leader is on top of every detail” ku Tsang a mustra korektamente riba dje. Al final ta nan ta wòrdu responsabilisá ante elektorado.
****
E manera ku ta kere por skapa di e bòmbòshi di nombramentunan polítiko sin tuma akshon konkreto manera entre otro Mike Willem MBA a deklará na su entrada den Bestuurscollege, ta polítikamente mortal pa lider polítiko di PAR Emily de Jongh-Elhage. Ta masha hopi kos a bisa i hasi (intervenshon via di Gobernadó) ku a krea e persepshon ku ta bai hasi korekshon di kosnan ku no tabata korekto. Si a amplia e “scope” di e investigashon no ta relevante.
****
Ku den e asuntu di desaroyo di e área di Rif, ta tapa kara pa presensia di hendenan ku pa usa terminologia diputado Eugène Rhuggenaath no ta “van onbesproken gedrag” tampoko a pasa inatvertí. Esaki tampoko no ta kumpli ku persepshon krea pero ta defroudá esnan ku tabata kere den bibamentu real di reglanan di bon gobernashon. Ku a pretendé di tin un “dekkingsplan” pero al final di kuenta a bin dal den un défisit ku a kana bai laga gobièrnu tampoko ta akshonamentu ku ta kumpli ku espektativa.
****
Un elekshon ku ta resultá den formashon di un gobièrnu ku rashonalmente mester kalifiká komo inkompetente pa goberná, ta konsekuensia di defroudamentu di elektorado dor di esnan ku mester sa mihó, lo tabata por mihó pero den práktika a keda sin kumpli ku persepshon kreá. Papiamentu dushi no ta kita e sentimentu di malkontentu krea pa inkumplimentu. Ku tempu e ta fomentá agreshon.
****
Mi ta kere ku mando di PAR mester tuma poko distansia for di e turmulina ku preshon polítiko ta kousa pa wak kosnan bon promé ku ta lat. Ta virtualmente imposibel pa koregí kos na inisio di kampaña elektoral. Si no reposishoná i profilá mas konforme ku e realidat, tampoko keda sin intervení den e situashon na nivel insular, e próksimo elekshon lo por resultá den un tsunami polítiko.
****
Laga mi ripití pa di tantísimo bia. Nos no por evitá “bloed, zweet en tranen” si es ku nos ke duna nos nietunan un mihó futuro. Na Ulanda drs. Jan Peter Balkenende a hiba un maneho di drecha e dak ora ku e tabata mira solo. Nos ta ketu bai den wega di kompa Nanzi. Nos ta kere ketu bai ku di bon semper ta aparesé. E realidat ta ku kosnan por bai di malu pa hopi mas peor.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.