Despues di kasi 9 aña ta skibi un kolumna den e prestigioso korant aki, m’a kuminsá puntra mi mes si tabata mihó pa en bes di ta kolumnista, m’a bira trahadó di sapatu. Pasobra, no ta pasa un siman, un kolumna, ku hendenan unda ku ta na mundu, ta kue e loke mi a skibi bisti, tum’é asina personal i kue bistié manera e proverbial sapatu. Ta manera un sapaté, ku kua sapatu k’e traha, ta pas “de eerste de beste” ku kue bistié. Inkreibel. Si en realidat ta sapatu mi tabata traha, masha dia lo mi a bira un magnate di sapatu. Un “Prada”, “Florscheim”, “Bali” of “Nike”.

Mi ta paga masha atenshon ora mi ta skibi mi kolumna pa mi no ofendé niun hende. Sigur pa mi no bira personal. Ora mi menshoná nòmber mes, ta pa mi indiká un persona embolbí den e sirkunstansia riba kua mi ta skibi. Ku otro palabra, e persona no ta importámi. T’e sirkunstansia ta konta. Kiko mi ta gana dor di bira personal? Ki benefisio un persona ku ta tuma e molèster di lesa mi kolumna tin, di lesa kosnan personal di otro hende? Niun. Banda di esei, m’a haña sufisiente edukashon di mi mama Shon Me i mi tata Fenton (tur dos den felis memoria!) pa sa ku den un diskushon, no ta e hende ta importante, sino e tópiko, e “issue” riba kua ta debatiendo. Un kos si! Mi no tin miedu di skohe ni señalá tópikonan ku otronan lo preferá pa laga un banda. Kolumna ku un kontenido tribi? Si. Kontroversial? No! Chupa for di dede? Hamas.

Loke tampoko mi por komprondé ta e echo ku apesar ku bou di TUR mi kolumnanan mi ta invitá esnan ku ta les’é pa tuma kontakto ku mi, sea nan ta di akuerdo o no ku e kontenido, tòg tur ta skohe e kaminda, bueno, lagami yam’é “típiko di e yu di Kòrsou” komo nan forma di reakshoná. Nan ta topa un ruman di mi, ku no tin nada di haber ku loke mi a skibi i ta reklamá e pober ku “mi ta masha rabiá ku Bob pa loke el a skibi den korant”. Otro ta dediká programanan di radio kompleto na e persona Bob i no loke ta e “issue” pa zundra, sulfurá i hasi nan kurpa malu, en bes di bira man skibi un mail òf yama na telefon i reklamá. Esnan ku mas mi ta gosa t’e hendenan ku un tempu m’a kana skouder ku skouder ku nan den PAR. Hendenan ku djis pasobra mi no a bai di akuerdo ku algu di nan MANEHO komo polítiko/gobernando, a stòp di kumindá mi kompletamente. Awor lagami ta hopi kla si: No ta duel mi niun tiki ku nan no ta kuminda mas. Bob Harms no ta biba warda kumindamentu di sigur E hendenan ei! Pero mi ta menshoná esaki djis ilustrá e mentalidat di e yu di Kòrsou ora bo ta krítiko.

Mi ta masha orguyoso pa e echo ku den e kasi 9 añanan ku mi ta skibi e kolumna aki, nunka mi mester a hala atras òf rektifiká ni un lèter di loke mi a skibi. I pa esnan ku ta rabia, sulfurá òf hasi nan kurpa malu ku e loke mi ta skibi, mi tin un mensahe: ta mi intenshon, pa ku poder di Dios soberano, sigui skibi loke ta MI opinion i MI manera di mira kosnan ku ta pasa den Reino Ulandes. Ki tópiko ku ta! Pasobra ta esei ta esensia di un kolumna. Deskribí, señalá òf apuntá tópikonan segun e punto di bista di esun ku ta skibié. Awor, si bo no ta di akuerdo ku e kontenido, ta keda kompletamente na’bo si bo ta les’é si òf no.

Niun hende ta fòrsabu bisti e sapatu. Bo ta bistié pasobra abo kier bistié. Si ta asina mi shon, sigui bistié i kana prònk kuné. Kòrda si ku ta abo a skohe pa bisti’. Ami sigur no a fòrsabu!

Te otro siman ku poder di Dios!

(Kòrda semper ku bo por manda bo opinion, opservashon i hasta bo krítika riba kontenido di e kolumna aki na: bobharms1@gmail.com)