Sheik Lorito Hopi Gas ta yama tur hende un felis dia. Awe ta e último dia di yüli i ya kaba nos ta bai drenta ougùstùs. Por sierto ayera niun 2 no a kai atrobe den e bolitanan i nos a kuminsá kere awor si ku a lubidá di pone e 2 nan den e tómbolanan. Lorito mes lo bula wak awe nochi!
****
Anto for di ora nos a tende ku tin hopi gas (no gas di bientu!) rònt di Kòrsou, nos a disidí pa buska un tùlbant grandi pa nos bisti. Pronto nos lo bira sheik, segun nos a tende Min. Pres. bisa. Nos a keda masha kontentu pero di otro banda nos ta sigur ku e storianan di Ansary lo bolbe lanta kabes! Nos ta ansioso pa tende ta kuantu gas tin i pa kuantu tempu.
****
Por ta Ulanda, un pais di gas, tambe a tende kaba ku tin gas i ta p’esei Ulanda ta tumando nos ku dos man? Poef....! Nos mester a laga un bientu bai! No wòri, pasobra nos ta den pleno aire!
****
Un saludo pa Ramon Yung ku tambe tabatin su último dia na radio awe (por lo pronto). Awe mainta el a yama ayó na su oyentenan. Yung ta traha na Vigilante, ke men no preokupá, e tin trabou. Parse ku e tin proyekto grandi na kaminda banda di Parasasa.
****
Bo a tende kaba ku parse no ta bai sigui desaroyá Wechi mas. Te awe nos ta warda konstrukshon di e mil kasnan ku Nini a primintí. Pero parse ku ta bai ta un lucha serio pa hasi e área aki unu di desaroyo komo ku ya kaba Amigunan di Tera a kuminsá mula hacha. Nos a komprondé ku pa kolmo un biná di Kòrsou a kaba di haña dos yuchi den e mondi grandi aki loke ta pone ku tin mas argumentu pa sigui konservá e área.
****
Aya na Oostpunt nos amigu Willy tambe a kuminsá pèrdè pasenshi. El a tarda hopi mes! Awor aki definitivamente e ta bai demandá gobièrnu atrobe. Kere nos ku e kos ei ta manera un Spada di Damocles riba nos kabes!
****
Partido Nashonal tin un poko mala suerte ku su karteranan. Den salubridat no tin sufisiente kamber den sekshon di kuido intensivo, na Selikor no por kaba di disidí riba e kaso Asjes, na Curoil tin problema serio, preis di koriente por subi pero di awa no, Kraamkliniek a sera, barkunan venezolano no tin awa i Dios laga no tin epidemia di kólera ets. Tin manera un pispis den e karteranan ku e partido mester kombatí purá.
****
Anto, nos amigu Andruw tambe tin manera un pis pis. Nos a sugerié kaba pa e bin Kòrsou pa nos tene un orashon p’e. Despues di e orashon Lorito lo bai ku ne serka Tanchi Kuartu pa Ocho pa un bon wantatodo. Nos a bai wak e kaso di Andruw di serka i nos a yega na e konklushon ku ta e kantidat grandi di tatuahe ku e tin ta strob’é.

Foto lorito 3107

Tin un pensamentu ta bisa ku ora bo pone demasiado tatuahe, bo ta kòrta e loke ta konosí komo “meridianonan” den bo kurpa. Ta p’esei no por pone tatuahe ni percing ni bora orea pa loko. “Meridianonan” ta e liñanan di bida den un hende su kurpa. Nos lo laga Leo splika nos e kos aki mas mihó den próksimo dianan. Lorito no ta pone tatuahe ni aki ni aya!
****
Sheik Lorito Hopi Gas (no bientu) ta keda te aki awe. Ta fin di luna. Kòrda luna ta largu......! Te mañan ku Dios su poder!