Komishon di Mayornan Omega College lo sigui mobilisá kontra desishon di minister!


WILLEMSTAD – Komishon di Mayornan ta kondená e forma ku minister Omayra Leeflang a atendé ku e delegashon ku a yega na Konseho di Ministernan awe mainta, mustrando ku esaki no ta un forma pa un mandatario purba di resolvé un problema. Komishon di Mayornan ta konsiderá, ku minister Leeflang a harma su propio shou, na momentu ku a sali pa evitá 3 studiante i prensa huntu ku su delegashon di Departamentu di Enseñansa i ninga di skucha mayornan preokupá.
Den kombersashon ku bosero di Komishon di Mayornan, Ludtmila van Eps a deklará na LA PRENSA ku un biaha mas minister Leeflang ke demostrá ku no tin niun hende ku por bis’é nada. Por konkluí ku pa e aktitut di minister Leeflang Komishon di Mayornan lo sigui mobilisá i buska nan derechi pa ser skuchá. E intento di Komishon di Mayornan pa haña atenshon di promé minister, no a logra, debí ku e último aki tabata den un reunion i a primintí di drenta den kontakto despues ku Komishon di Mayornan.
Segun Ludtmila van Eps ta duna di konosé, ku e ruman muhé di promé minister tabata esun ku a sali pa papia ku e delegashon, mustrando ku nan bishita tabata no anunsiá i ku ta bira imposibel ku por haña e promé minister. Ruman muhé di e promé minister a tuma nan karta, pendiente di un yamada ku lo drenta. Di otro banda LA PRENSA a komprondé, ku minister Leeflang lo a bai paden ku tres studiante i prensa pa harma su propio shou den kompania di funshonario di departamentu.
Loke Komishon di Mayornan tabata deseá pa un kombersashon, pero no a resultá, ya ku minister Leeflang a mustra, ku awor ta e ta na palabra. Esaki sigur no a kai den bon tera, debí ku e mandatario no ta mustra su disponibilidat pa dialogá ku mayornan. E problemátiko di Omega College ta birando mas grandi i ku tin mobilisashon ta tumando lugá, den kua lo bai na purba di forsa minister Omayra Leeflang pa skucha, miéntras ku e mandatario ta sigui para tras di deklarashon di funshonarionan di Departamentu di Enseñansa. Awe mainta un biaha mas minister Leeflang a saka sifranan i pone dilanti di studiantenan i medionan di komunikashon, purbando pa desbaratá tur loke Omega College a trese dilanti den último dianan.