WILLEMSTAD – Den 5 kaso serio di krímen di último dos lunanan, hustisia a detené un kantidat di 20 sospechoso. Ta trata di e asesinatonan di e komersiantenan Nanick Daryanani i Pim Timmermans, e atrako riba un dama bendedó di number, e sekuestro di e komersiante Walid Omeis i e disturbionan den Punda i Pietermaai.
Segun informashon ofisial di Ministerio Públiko, na e momentunan akí tin 6 sospechoso detené den e kaso di sekuestro di e komersiante Walid Omeis, 3 sospechoso den e kaso di asesinato di e komersiante Pim Timmermans, 2 sospechoso den e kaso di e komersiante Nanick Daryanani, 2 sospechoso den e kaso di disturbio den Punda i 2 sospechoso pa poseshon di arma di kandela. O.M. a konfirmá ku entretantu a laga dos sospechoso den libertat. Pa loke ta trata detenshon den e kaso di atrako na Oosterbeekstraat, O.M. no tabatin e detayenan na man awe mainta.

(1) Asesinato Daryanani

E kaso di asesinato di e komersiante Nanick Daryanani a tuma lugá den e mardugá di 25 pa 25 di mei. E suseso a tuma lugá den Bloksteeg den e negoshi di Internet di Daryanani. E tabatin un kusinchi mará ku waya di koriente na su kara. Den e kaso akí a detené dia 20 di yüni den un kas na Muizenberg e hòmber (1) M.P (37). Mesun dia a detené na warda di polis na Otrobanda e hòmber (2) H.E. (45).

(2) Asesinato Timmermans

E kaso di asesinato di Pim Timmermans, propietario di restorant La Rousse, a tuma lugá dia 16 di yüni na altura di su kas den Penstraat. Algun atrakadó a tir’é ku arma di kandela i herid’é mortalmente. Dia 9 di yüli polis a detené den un kas na Maastrichtstraat e hóben (3) H.M. di 15 aña di edat relashoná ku e asesinato di Timmermans.

(3) Atrako Oosterbeekstraat

E kaso di atrako riba un dama bendedó di number a tuma lugá dia 18 di yüni na Oosterbeekstraat. Un atrakadó a tira e dama I.M. (51) ku un arma di kandela i herid’é na altura di su pechu. Dia 8 di yüli polis a detené den un kas na Maastrichtstraat e hóben (4) F.P. di 16 aña di edat relashoná ku e atrako akí. E dia ei tambe a detené e hóben (5) S.R. di 16 aña di edat pa poseshon di arma di kandela ilegal. Dia 11 di yüli polis a detené na un snèk na Berg Altena e hóben (5) I.C. (19) relashoná ku e kaso di atrako na Oosterbeekstraat. E tabata envolví tambe den un otro kaso kaminda el a heridá un hòmber ku un arma di kandela.

(4) Maltrato Moreno

E kaso di maltrato di e siudadano Carlos Moreno a tuma lugá dia 26 di yüni na un establesimentu di horeka na Nieuwstraat. E anochi ei algun hòmber a drenta den e establesimentu i a maltratá e bishitantenan. Moreno a haña un fraktura serio na su kráneo okashoná pa un sla ku un krùk di bar. Dia 23 di yüli polis a detené den un kas na Buena Vista e hòmber (6) J.F. (36) relashoná ku e kaso di maltrato akí. Ayera dia 30 di yüli polis a detené dilanti di Marshe Bieu na De Ruyterkade e hòmber (7) G.A. (43) sospechá di e tuma parti na aktonan kastigabel riba e dia en kestion.

(5) Sekuestro Omeis

E kaso di sekuestro di e komersiante Walid Omeis a tuma lugá dia 10 di yüli na Esperanzaweg. Algun hòmber a yega na e víktima su kas i a bai kuné den nan outo. Dia 14 di yüli polis a detené den un kas na Monteverde e hòmber kolombiano (8) J.M. relashoná ku e kaso di sekuestro di Omeis. Dia 14 di yüli polis a detené e hòmbernan venesolano (9) G.R. (54) i (10) R.A. (31) i e hòmber kolombiano (11) J.M. (25) riba un boto na Fuik. A detené nan relashoná ku sekuestro di Omeis. Tambe a detené riba e mesun dia den un kas na Dein e hòmbernan yu di Kòrsou (12) A.H. (37), (13) L.O. (49), (11) R.M. (53) i e muhé dominikano (14) A.de A. (52). Na altura di un snèk den Dein polis a detené e hòmbernan yu di Kòrsou (15) W.S (22) i (16) J.L. (17). Na Amerikaanse Kamp a detené e hòmber kolombiano (17) O.P. (27). E detenshonnan akí ta relashoná ku e kaso di sekuestro segun e relato ku polis a manda pa prensa. Dia 29 di yüli polis a detené na Montaña e hòmber hamaikino (18) L.R. (20) relashoná ku e kaso di sekuestro. Tambe a detené na Gibraltar e hòmber (19) T.B (32). Ayera dia 30 di yüli polis a detené na Barbouquet e hòmber hamaikino (20) S.B. (24) relashoná ku e kaso di sekuestro akí.