ORANJESTAD- Dia 15 di juli 2008 tabata exactamente 25 aña pasa cu Sr. Jessy Beukenboom a drenta servicio di gobierno y a cuminsa eherce su labornan na Instituto pa Deporte Educacion Fisico y Recreacion (IDEFRE).
Despues di a gradua cu un Bachelors Degree den educacion fisico y deporte na Whittier College na California, Sr. Jessy Beukenboom a regresa Aruba na luna di juni 1983 y dia 15 di juli 2008 el a drenta servicio di gobierno como instructor di deporte y a bai traha na San Nicolas Sportcentrum na unda e a keda encarga cu organisacion y ehecucion di programanan di deporte pa scolnan y hobennan den e centro deportivo. Siguientemente un resumen di su carrera como empleado publico.
Juni 1983-1985 instructor di deporte na San Nicolas Sportcentrum;
Mei 1986 Hefe di San Nicolas Sportcentrum, coordinador di programanan pa deporte escolar y ehecucion di instruccion di deporte den bario y na institutonan manera Servicio di Bombero, Instituto Coreccional y Fundacion pa Personanan cu limitacion mental;
1989 nombra como hefe interino di IDEFRE banda di su funcionnan como hefe San Nicolaas Sportcentrum, instructor di deporte y coordinador di programana deporte escolar;
1990-1996 hefe interino di IDEFRE, hefe di San Nicolas Sportcentrum, hefe di instructornan deportivo y coordinador di actividadnan deportivo;
1993-1996 encarga cu maneho diario di IDEFRE pa motibo di traslado di director
1997-2006 encarga cu maneho diario di IDEFRE pa motibo di traslado di director y for di 2003 te cu 2006 pa motibo di vacatura di funcion director IDEFRE
1 september 2006 nombra director IDEFRE
Sr. Jessy Beukenboom tambe a yega di funciona y/of representa IDEFRE den diferente comision y organisacion manera: Conferencia Internacional pa Personanan Incapacita (CACEFI), Miami International Baseball World Series, Simposio di Deporte, Khoury League International World Series, Aruba Boxing Commission, Stichting Koninkrijkspelen Aruba, Comision di Subsidio pa Deporte, Premio Simplemenente Deporte, World Anti-Doping Agency,y Consejo Americano del Deporte, pa menciona algun.
Dia 25 di juli 2008 den presencia di ministro di Labor, Cultura y Deporte Sr. Ramon Lee, coleganan, invitadonan y famia, Sr. Jessy Beukenboom a recorda y celebra e ocasion special aki di 25 aña di hubileo.