A extende participacion den maximo organisacion mundial di post

ORANJESTAD- Sr. Maurice Adriaens, Minister di Transporte y Communicacion di Antiya a bishita su colega Minister di Aruba, sr. Tai Foo Ramon Lee. Intencion principal di e reunion tawata pa delibera y dicidi pa, conhuntamente, Aruba cu Antiya aplica pa bira miembro di e conseho administrativo di Universal Postal Union (UPU), e maximo organisacion mundial cu ta regarda asunto di post. Na e reunion tambe tawata presente dos conseheronan di maneho, esta sra. Martines di Ministerio di Transporte y Communicacion di Antiya y sra. Tromp di Ministerio di Labor, Cultura y Deporte.
Manera ta conoci Antiya y Aruba hunto ta miembro cu derecho di un voto den Universal Postal Union (UPU). Ta conoci tambe cu e entidad combina di Antiya Hulandes y Aruba (NA&A) tabata envolvi cu e fundacion y desaroyo di e union desde e tempo di su establecimento.
Den e capacidad aki NA&A semper a hunga un papel importante den e proceso di desaroyo postal den e region di Caribe. Tanto Aruba como Antiya Hulandes ta tambe, miembronan fundador di e Caribbean Postal Union (CPU) y tabata instrumental den promocion di cooperacion postal den espirito y observacion di e actonan di UPU. Como miembro di CPU, ambos pais tambe tabata envolvi den actividadnan cu meta di desaroyo di administracion di post den region Caribe.
NA&A a pasa recientemente den un proceso rigido y exitoso di reforma postal cual actualmente ta pone ambos den un posicion di ehempel den region Caribe pa loke ta stimula e efecto di cambio global den e region tocante post. Basa riba nos experiencia regional NA&A ta sinti e necesidad di extende su contribucion na comunidad global di post.
Despues di e deliberacion a firma un carta di aplicacion pa bira miembro di e conseho administrativo di UPU. Ambos gobierno a dicidi di aplica pa miembrecia di e conseho di Administracion di UPU y ta spera di es manera aki por sigui contribui na un di e cuerponan di mas importante den UPU, cual sin duda lo trece varios beneficio pa ambos isla.
Alabes e dos ministernan a haci uso di oportunidad pa intercambia informarmacion y experiencia, caminda hopi topico a keda trata e.o. asuntonan general di post (regulator) y desaroyo ariba tereno postal y telecomunicacion y asuntonan cu ta regarda consecion.
A keda palabra cu lo bai mantene un contacto estrecho cu otro pa asina por keda intercambia ideanan y experiencia.