BEIJING – E sensura riba prensa, doping i kontaminashon ta e prinsipal preokupashonnan di e presidente di Komité Olímpiko Internashonal (KOI), Jacques Rogge, i otro dirigentenan di e organismo ku lo reuní e fin di siman aki pa un último revishon riba e preparashonnan promé ku inougurashon di e Weganan Olímpiko di Beijing otro siman.
KOI i e organisadónan chines a ser kritiká ku e no ta kumpli ku su promesa di pèrmití akseso sin restrikshon riba Internèt, libertat total na prensa i airu limpi.
E Weganan di Beijing supuestamente lo por mustra China komo un super potensia habri pa mundu. Pero hopi aspekto di e evento ta sigui kousa problema i e posibel menasanan terorista a ser usá pa hustifiká un seri amplio di seguridat di komo 500.000 persona.
E mancha mas resien riba e Weganan a bini e siman aki ora Kevan Gosper, un di e máksimo lidernan di KOI i hefe di e komishon di prensa a hala atras di un promesa ku el a hasi kuater luna pasá pa eliminá tur sensura riba Internèt pa e periodistanan durante e weganan.
E kadenanan di televishon a reklamá di ku e organisadónan a ninga promesanan similar, loke a produsí batayanan pa e kubrimentu direkto, e movementu di e trùknan di satélite i e repartishon di frekuensianan.
Djaweps, dunando di konosé ku tin divishon den seno di liderato di KOI, Gosper a bisa ku Rogge mester tabata sa di un akuerdo ku outoridatnan chines pa sensurá e akseso riba Internèt pa periodistanan ku ta kubri e Weganan.
Den un entrevista ku AP, Gosper a indiká ku e no tabata sa dje kambionan sino te djamars, ora e bosero di e komité organisadó di Beijing, Sun Wiede, a bisa ku e periodistanan lo por tin “sufisiente akseso” riba Internèt.
“Lo mi keda sorprendé si un hende a hasi sierto kambio sin al ménos informá esaki na Rogge”, Gosper a señalá. “Pero realmente mi no sa e detaye. Solamente mi saku e reglanan riba e sensura a kambia, pero apénas nan a anunsiá nos aki. E mester ta relashoná ku un akuerdo anterior di kua mi no tabata partisipante”.
“Sigur esei no ta loke nos a garantisá prensa internashonal, i sigur e ta bai kontra di e sirkunstansianan normal pa kubri e Weganan Olímpiko”.
Rogge a yega Beijing djaweps, pero el a ninga di papia ku periodistanan na airopuerto. Posiblemente lo e ser kuestioná a kolega i periodistanan, ya ku den pasado el a bisa ku prensa lo tin libertat total pa traha na China.
Sun a bisa e siman aki ku periodistanan lo por tin “sufisiente akseso”. Sitionan manera esun di Amnistía Internashonal, otronan ligá ku Tibet o informashon riba e masakre di 1989 riba Plasa di Tiananmen a ser blòkiá pa e periodistanan ku ta traha den instalashonnan olímpiko o den e sentro di prensa.
E ‘smog” di airu di Beijing te ainda no a disparsé despues di dos siman di medidanan drástiko pa kontrol’é, ku ta inkluí saka for di sirkulashon mitar di e vehíkulonan si e siudat i seramentu di industrianan.
Komité ehekutivo di KOI djasabra lo inougurá un reunion di dos dia den un hot di Beijing, siguí pa un seshon di tres dia di e asamblea general for di djamars.
Den e reunionnan di KOI lo diskutí tambe e programa anti doping di e Weganan, ku outoridatnan olímpiko a deskribí komo esun mas rigoroso den historia di deporte ku un 4.500 tèstnan.