WILLEMSTAD – E skarsedat di maestro di skol, ta keda un problema agudo, apesar ku pa e aña eskolar nobo, gobièrnu a kontratá 21 maestro penshonado. Esei ta loke ku Sidney Justiana, presidente di SITEK, a bisa LA PRENSA. Segun Justiana, e hecho ku algun luna pasá, gobièrnu a kuminsá e trayekto pa buska dosente for di Sürnam, ta indikashon ku e skarsedat ta un problema serio.
Den kòmbersashon ku LA PRENSA, diputado di enseñansa, Alcalá-Wallé, a partisipá ku pa e aña eskolar ku ta bai kuminsá, no tin skarsedat mas, despues ku a haña 21 maestro di skol ku a baha ku penshun, pa bai traha.
E presidente di SITEK a sigui bisa LA PRENSA ku e informashon ku e sindikato ta disponé di dje ta indiká ku tin sufisiente maestro di skol, pero ku e ta realista ku nunka no tin sufisiente dosente pa tur nivel di material. Manera ta tradishon, e sindikato di enseñansa, despues di algun dia ku skol habri, ta reuní ku su shopstewardnan. Durante dje enkuentro aki, direktiva di SITEK ta pone su mes na altura di e situashon di okupashon di dosente na e skolnan. Asina Justiana a sigui splika. Ademas den e reunion general di e sindikato ku ta tuma lugá dia 15 di ougùstùs awor, e sindikato ta evaluá e situashon. Justiana a mustra riba e realidat, ku na komienso di skol por tin sufisiente dosente, pero ku segun dia ta pasa, e disponibilidat por kambia.
E sindikato tambe a tuma nota, di e hecho ku pa e aña eskolar aki, gobièrnu no a logra reklutá maestro di skol for di Sürnam. Segun Justiana, SITEK ainda tin su reservanan riba e reklutashon aki i ta keda insistí ku un reklutashon asina, méster ta kompañá pa un proseso di familiarisashon pa e dosentenan for di Sürnam.