Submitted by admin on Fri, 01/08/2008 - 22:23.
MUNDU, - E amantenan di astronomia, semper si nan ta na e lugá indiká, lo por disfrutá awe djabièrnè di un eklipse total di Solo, ora e Luna ta entre e estrea i nos planeta.
E fenómeno úniko aki ta pone ku ta mira e Solo komo un ‘renchi’ di lus i parti meimei ta totalmente skur pa e sombra di Mundu.
E eklipse lo kuminsá na ártiko canadiense mas o ménos 9:45 GMT (15:45 ora lokal).
E sombra lo move i lo mira un ‘renchi’ di lus na Groenlandia, Siberia oksidental i Mongolia pa tèrminá den sentro di China, mas ku un ora i mei despues.
Su rekorido total lo bai ta di 10.200 kilometer.
Gran parti di Europa, Asia i nort di Nort Amérika lo por opservá un eklipse parsial.
Manera sa sosodé den e kasonan aki, turistanan, hendenan kurioso, astrónomonan profeshonal i amatùr a inundá e poblashonnan kaminda e eklipse lo bai ta total.
Na Novosibirsk, e kapital kultural i sientífiko di Siberia, ta spera mas o ménos 5.000 bishitante.
E sientífikonan a rekòrdá e públiko ku nan no tin mag di mira e Solo direktamente, inkluso den e kaso di un eklipse parsial sin protekshon, ya ku esaki por daña e retina di forma permanente.
Solamente por mira e Solo ku yudansa di un teleskop solar òf brelnan spesial.
Foto: Eklipse luna 0108
Luna ta pasa dilanti Solo durante e eklipse solar total banda di e krus di St. Bazil’s Cathedral, man robes, na Mosku awe.
Foto: Eklipse di Solo 0108
Por mira e eklipse parsial di Solo dor di nubianan na Hyde Park na sentro di London awe.
Foto: Astronomo 0108
Un astrónomo ta para wak den un teleskop e eklipse parsial di Solo na Hyde Park awe.
Foto: Sientifiko 0108
Un sientífiko ta prepará un teleskop na Mosku awe.
Foto: Polis metropolitano 0108
Un polis metropolitano na sentro di London awe ku su brel spesial bistí ta wak e eklipse parsial di Solo.
Foto: Eklipse 0108
Un dama ta tèst su brel spesial ku el a kaba di kumpra na Novosibirsk, siudat di Siberia.
Foto: Eklipse 1 0108
Hendenan ta para tèst nan brel spesial na Novosibirsk.
Foto: Eklipse 2 0108
Un dama ta bende e brelnan spesial riba kaya na Novosibirsk.
