WILLEMSTAD - Gensley Capella, presidente direktor di Curoil no ta aseptá niun medida kontra dje den kuadro di e investigashon ku ta tumando lugá den e negoshi ilegal ku a tuma lugá ku benta di disel. Ela bisa ayera tardi ku e ke sa ofishal dentro di 24 ora ta kiko ta e motibu ku ke pone su persona temporalmente un banda.
“Si tuma medida kontra mi, ami ta bai korte”, asina Capella a sigurá ayera tardi durante un enkuentro ku prensa.
E kaso na Curoil dia pa dia ta haña aspektonan mas interesante.
Capella a splika ku presidente komisario Earl Barborda, kompañá pa komisario Pieternella a presentá serka dje ayera mainta ku e petishon ku nan ke reuní kuné.
Na e momentu ei nan a present’é nan desishon ku e mester bai ku fakansi obligatorio pa asina por hasi un investigashon imparsial.
“Ami a bisa nan ku ta esei nos di gerensia di Curoil tambe ke. Pero pa evitá tur spekulashon, nos ke pa hunta di komisario realisá e investigashon aki. Nos a bisa nan ku nos no ke pa nan raportá, ni na e direktor, ni na e tim di maneho,” asina Capella a trese dilanti.
El a bisa ku no ménos ku 5 miembro di gerensia a firma pa e benta di diesel en kuestion tuma lugá. Ningun di e 5 miembronan aki, no a ripará ku tabatin algu straño, anto esei no ta asina sorprendente tampoko. E negoshi ku diesel aki ta un negoshi masha normal, Capella a enfatisá mas aleu.
Na e momentu ei sinembargo, e komisarionan a inform’é ku nan ke pa e bai ku fakansi obligatorio, loke ela ninga redondamente.
Na momentu ku el a ninga esei, a inform’é ku lo pone ofisialmente riba non aktif, pa asina e investigashon por tuma lugá tòg.
“M’a bisa nan ku si nan ke suspendémi, anto mi ta bai korte. Ami ta konsiderá un medida asina un medida disiplinario, anto ami no ta weta kiko mi a hasi,” segun Capella.
El a rekonosé di otro banda ku por a hasi mihó.
“Pero bo ta traha ku hende i kaminda tin hende, bo por hasi eror. Pero mi no ta kere ta korekto ni hustu, pa kue e problema aki i hasié di un tamaño ku ya e no ta real mas,” Gensley Capella a bisa.
Capella a bisa finalmente ku el a eksigí pa e tende kiko ta e motibu ku ke suspendé, pasobra e ta kla pa bai korte ku e kaso aki.