WILLEMSTAD - Ainda tin hopi pregunta kiko realmente a sosodé na e kompania Curoil.
Partido Nashonal di Pueblo en todo kaso ta para kompletamente tras di su diputado Humphrey Davelaar den e kaso aki i ta para ‘riba pa bin un investigashon imparsial den e kaso aki.
Davelaar a tuma nota di e kaso despues di a regresá di su biahe pa Cuba kaminda el a bai negoshá pa haña spesialistanan pa traha den unidat di Kuido Intensivo di Hospital St. Elisabeth.
Segun presidente dje partido mr. Faroe Metry, loke a pasa ta inaseptabel pa Partido Nashonal.
“Ainda tin hopi pregunta ku mester haña kontesta. Nos ta kere ku e asuntu aki definitivamente a perhudiká Curoil. Nos tin sigur ku e kompania aki por a gana mas tantu plaka, si el a atendé direktamente ku e suministrado di diesel. Pero nos no sa por ehèmpel si tabatin mas intermediario entre Curoil i esun ku a suministrá e produkto. Nos no sa di unda e diesel ta bini, si ta trata di diesel ilegal, diesel hòrtá i asina tin mas pregunta ku meresé kontesta. E asuntu di negoshi den negoshi aki, nunka por ta na benefisio di Curoil,” Metry a bisa.
Segun e presidente di PNP, ta p’esei e partido ta na fabor pa gerensia hala un banda temporalmente pa asina krea espasio pa un investigashon imparsial por tuma lugá.
“E hecho ku ta pidi gerensia pa hala un banda no ta nifiká ètòl ku ta poniendo kulpa riba niun hende. Nos no ta bisa ku ta fiha un dede akusatorio kontra gerensia di e kompania, pasobra ta e investigashon mester determiná kiko realmente a sosodé. E ta simplemente un medida di órden pa evitá ku gerensia ta sikiera krea e impreshon ku e ta strobando e investigashon,” segun Faroe Metry.
Metry a para riba si, pa e investigashon tuma lugá pa un kompania imparsial, independiente pero un kompania ku konosementu di materia. Mester ta un kompania ku tin bon i profundo konosementu di e mundu petrolero i produktonan petrolero.
E no por ta por ehèmpel un investigashon kondusí pa akountent di Curoil mes. Mester investigá e asuntu aki profundamente, pasobra posiblemente tin mas pais enbolbí i por tin mas instansia enbolbí, asina Faroe Metry a agregá.