WILLEMSTAD – “Ami ta bai korte, pasobra ami no a hasi nada. Ta dos chabalito a hinka mi den e problema, den e bochincha, e baina aki. Anto un di nan a manda algun dia pasá un mail p’ami, kaminda e ta pidi mi dispensa pa loke el a hinkami aden. Awor, kiko mi por hasi ku e dispensa ei?” Gensley Capella a puntra.
Capella tabata referí na loke a sosodé na Curoil ku benta di diesel, un kaso ku a haña hasta e nòmber di Curoil-gate serka sierto medionan di komunikashon.
Den un nota ku Capella a traha relashoná ku loke a sosodé, e ta bisa ku aki por papia di un kaso kaminda hende a abusá di un konfiansa ku a pone den nan.
Jason Debrot, un di e personanan konserní tabata konosí komo un eksperto riba tereno di negoshi di diesel. E tabata e wowo i orea di Curoil den esaki.
Komo ku Debrot a logra establesé konekshonnan importante ku e mundu ku ta suministrá e produkto aki, Curoil tabata konfia siegamente den dje. Curoil a konfia dje tantu ei ku asta a pone un montante mionario na su disposishon pa e hasi negoshi pa e kompania, pero ta aki kosnan a bai robes, pasobra el a hasi uso di e plaka pa logra benefisio propio. Ademas t’asina ku niun hende por a maginá nan mes ku tin un laso entre Debrot i e kompania RCM Holding, ku ta propiedat di Roberto Carlos Maldonado.
E direktor di Curoil ta bisa ku masha énfasis ku no tabatin asuntu di ladronisia.
Loke nos por konkluí ta ku nos a pèrdè di gana. Nos mes por a kumpra e produkto aki na un preis mes, òf mas faborabel asta serka e kompania en kuestion.
Ta ora ku e kompania a presentá un kleim di 1 mion dollar ku Curoil lo mester tabata debe, e kos a kuminsá lora, pasobra Curoil a start un investigashon mesora.
“Nos a splika e representante di e kompania ku nos no debe nan niun dollar. Nan a menasá di bai publisidat, pero nos a bisa nan ku nan ta liber pa hasi esei, pasobra aki no por papia di inkumplimentu,” segun Capella a trese dilanti.
Na e momentu ei, tantu Debrot komo Maldonado a entregá nan retiro na e kompania Curoil, evidentemente pasobra nan a sinti ku a deskubrí e negoshi ku nan tabata hasiendo.
El a mustra mas aleu ku tin kasonan konosí di pasado, kaminda tabatin kos grave ku a pasa, pero ku no tabatin konsekuensha pa niun hende.
“Mi ke duna algun ehèmpel di Curoil mes. Algun aña pasá a fakturá 26 mion florin di mas. E direktor no a bai. A eliminá un debe di Hugo Gerharts (komersiante di Boneiru, red) di 13 mion. E direktor no a bai kas e tempu ei. Den mi kaso, nos no a pèrdè nada. Nos a paga pa un produkto, nos a haña e produkto ei tambe. Curoil no a ser perhudiká, numa ku e resultado por tabata mas positivo,” segun e direktor di Curoil a afirmá.
Capella a haña sosten di trahadónan ayera ku a presentá masalmente na Trupial Inn pa asistí na e konferensha di prensa kaminda el a duna un splikashon amplio di e último desaroyonan. Por sierto tabatin e impreshon ku e trahadónan, prinsipalmente esnan ku ta traha riba trùk a krea blokeo riba kaya pero polis a bisa ku esei no tabata korekto. Loke a pasa tabata ku komo ku tur e trùknan a Sali pareu esei a kousa sierto inkonvinensha den tráfiko. Polis a para e trùknan na altura di Groot Davelaar i a indiká na nan ku nan no por a sigui bai mas pariba den direkshon di e hotèl. Bosero di Polis a bisa ku tur hende a kumpli kabalmente ku e instrukshonnan. Riba e portrèt parti di e personal den e sala ku a bin duna sosten na Capella.