WILLEMSTAD -
“Mi no ta komprondé unda tin kompetensia inhustu kontra UTS. Ta nan mes lo mester splika mi kiko nan ta komprondé bou di esei. P’esei mes nos a palabra den reunion di Konseho di Minister ku nos lo sinta na mesa pronto ku gerensia i hunta di komisario di UTS pa diskutí e asuntu aki.
Tantu direktor di UTS Paul de Geus komo e sindikato di trahadónan di e kompania Sitkom a ekspresá nan desakuerdo i preokupashon profundo pa e eminente desishon di minister Adriaens pa duna Columbus Network Curacao pèrmit pa establesé riba nos isla.
Columbus ke establesé pa duna servisio di tantu konekshon internashonal komo e servisio di Internèt.
Segun UTS, esaki ta kompetensia inhustu, pasobra Columbus ta poseé e kabel atraves di kua UTS mes ta kumpra e konekshon internashonal. Si Columbus bai ofresé su servisio riba merkado lokal, esnan ku ta kumprando esaki awor aki serka UTS lo bai Columbus, loke ta perhudiká UTS, segun e kompania.
Minister Adriaens sinembargo ta refutando esaki. El a mustra ku Columbus mester bai paga e mesun tarifa ku otro suministradonan di servisionan tin ku paga. E kos aki no por ta kompetensia inhustu kontra UTS, di akuerdo ku e mandatario.
Minister Adriaens anteriormente a bisa ku e ta mira bentaha so ku yegada di Columbus.
“Presensia di e kompania Columbus lo tin un kantidat di benefisio pa nos pais. E ta nifiká realisashon di un deseo grandi ku mi tin, esta pa redusí preis di Internèt di manera ku tur kas di famia ta disponé di Internèt,” asina Adriaens a bisa.
Kontrali na tur sorto di spekulashon, minister Adriaens a enfatisá ku ainda mester tuma un desishon final riba establesimentu di Columbus. E kompania no tin lisensia ainda. Lo tuma un desishon durante un reunion na fin di ougùstùs awor.
Adriaens a bisa, ku riba término largu, nos lo haña prueba ku no tabatin asuntu di perhudiká UTS.
El a referí na loke a sosodé algun aña pasá ku e introdukshon di un di dos kompania ku tabata bai dediká su mes na e negoshi di telefon selular.
“E tempu ei tambe mi a tende ku un di dos kompania lo mata e negoshi di selular ku UTS a kaba di kuminsá kuné. Mi ta kòrda kon UTS tabatin den kuminsamentu apénas algun mil abonado di telefon selular.
Awendia e kantidat di abonado a krese den forma inkreibel i UTS ta ganando hopi plaka. Mi ta kere ku e mesun kos lo sosodé tambe ku yegada di Columbus,” segun Adriaens.
Te awor aki ta UTS ta e úniko kompania ku kabel riba e sistema di konekshon internashonal, Tur hende mester pasa via UTS. Den kaso di Columbus, e kompania ta disponé di su mes kabel i e ta bai ofresé mas servisio.
“Ami ta kere ku preis di Internèt lo bai baha. Den e kaso aki no ta UTS ta e intermediario. Komo minister mi a bisa semper ku tur 150 mil kas na Kòrsou mester por disponé di Internèt ku spit haltu,” di akuerdo ku e minister enkargá ku Telekomunikashon.