WILLEMSTAD - “Mi ta haña ku korte a papia palabra kla: Ulanda awor aki mester obligá Antia pa kumpli ku loke korte a dikta riba rèspèt pa derechinan di hendenan homoseksual. Si Antia no kumpli, kisas ta bon pa rekonsiderá e asuntu di pagamentu di debe di Antia”, asina miembro di Tweede Kamer pa partido VVD Anouchka van Miltenburg a deklará den entrevista ku Tania Fraai di Radio Nederland Wereldomroep.
Den e programa “Linea Recta” e parlamentario a para ketu na último desaroyonan den e asuntu aki. Miltenburg a manda un seri di pregunta pa minister Ronald Plasterk den kua e ta kuestioná aktitut di gobièrnu i ta boga pa akshon.
Miltenburg a bisa ku e ta sorprendí pa e aktitut di gabinete Balkenende den e asuntu aki. Korte a dikta sentensia i ta parse mi ku el a papia palabra kla. El a bisa, ku loke e ke no ta djis un deklarashon ku gobièrnu ta pidi Antia pa respetá derechi di esnan ku seksualmente tin otro sintimentu.
“Gabinete ulandes mester manda un señal fuerte den direkshon di gobièrnu antiano. Mester ta kla pa Antia, ku no por sigui ku e tipo di wega[nan aki mas,” Van Miltenburg a bisa.
Manera ta konosí, minister antiano Omayra Leeflang a anunsiá, ku gobièrnu antiano lo apelá e sentensia ku ta bisa ku gobièrnu antiano ta obligá pa inskribí e pareha lesbiana na ofisina di BZV.
Ta konosí kaba di pasado, ku Omayra Leeflang, semper tabata kontra matrimonio di e mesun sekso. Den pasado tabatin e kaso ku a hunga prinsipalmente na Aruba pa kua e mandatario antiano tabatin e mesun pensamentu i punto di salida.
Pa minister Leeflang, e kaso ta un kaso di prinsipio. El a mustra ku na Antia nos no konosé matrimonio di e mesun sekso. Segun e definishon pa Antia, un matrimonio na Antia ta monogamo i heteroseksual, ku ta nifiká ku un matrimonio ta entre un hòmber i un muhé. Un muhé tampoko por tin mas ku un hòmber komo kasá, un hòmber tampoko por ta kasá ku mas muhé.
“Mi tin gana di sa kiko lo pasa, si na Antia nos disidí den futuro, ku nos ta aseptá poligamia, esta kaminda un hòmber por ta kasá ku mas ku un muhé. Ulanda lo tuma esei outomátikamente over? E pensamentunan ulandes riba matrimonio, no por pone e definishon aki di Antia sin mas un banda,” Leeflang a bisa.
Van Miltenburg ke pa gobièrnu antiano kanselá e kaso di apelashon ku el a kuminsá den e kaso aki.
“Nos mester realisá, ku simplemente mester rekonosé derechi di esnan homoseksual. Si nos ripará ku Antia no ke hasi esaki, anto mi ta haña ku Ulanda mester konsiderá sanshon kontra Antia. Si e minister ta papia di un proseso demokrátiko kaminda a determiná ku un matrimonio na Antia solamente por ta entre un hende hòmber i un hende muhé, ami ta bisa ku ta un derechi demokrátiko tambe pa respetá desishon di korte i respetá derechinan di esnan homoseksual,” segun Van Miltenburg.
Djasabra awor tin e parada di boto ku homoseksualnan a organisá. Manera nos a informá kaba, chèns ta grandi ku e boto ku mester a bai ku homoseksualnan di Antia i Aruba lo no sali mas, pasobra na último ora un kantidat grandi di partisipante a kanselá nan partisipashon.
Van Miltenburg a lamentá esaki. El a bisa ku presensia di e boto aki ta un bon señal, pero e forma ku gobièrnu antiano a bin ta ekspresá su mes, sigur no ta stimulá e desaroyo di mas rèspèt, el a bisa. El a lamentá ku tabatin asina tantu kanselashon.
Van Miltenburg a bisa, ku e lo no partisipá na e parada e aña aki, simplemente pasobra e no a haña invitashon. Awor aki mi ta ku fakansi, pero otro aña sigur lo mi ta partisipando, asina Anouska van Miltenburg a sigurá.