WILLEMSTAD - “Presensia di e kompania Columbus lo tin un kantidat di benefisio pa nos pais. E ta nifiká realisashon di un di mi deseonan, esta pa redusí preis di Internèt, di manera ku tur kas di famia ta disponé di Internèt,” asina minister di Telekomunikashon ingeniero Maurice Adriaens a bisa, despues di e anunsio ku e kompania tin intenshon di establesé su mes na Kòrsou.
Adriaens a enfatisá ku ainda mester tuma un desishon final riba establesementu di Columbus. Esei lo sosodé durante un reunion na fin di ougùstùs awor.
Mester bisa ku último dianan a surgi asta un frikshon leve entre e mandatario antiano i lider polítiko di partido Frente Obrero Anthony Godett, kende ta diputado den e aktual Bestuurscollege.
Godett a kritiká e hecho, ku e minister no a pone e na altura di e plannan pa Columbus establesé na Kòrsou. Tur hende sa ku tur tempu mi a sali na defensa di e kompania lokal di telekomunikashon UTS, ela bisa.
Minister Adriaens a informá entretantu, ku Columbus a kumpli ku tur rekisito i ku e ta spera ku fin di otro luna, lo tuma un desishon al respekto. Adriaens a refutá e akusashon ku el a sòru pa kompetensia inhustu pa UTS. Riba término largu, nos lo haña prueba di esei tambe, el a pronostiká.
El a referí na loke a sosodé algun aña pasá ku e introdukshon di un di dos kompania ku tabata bai dediká su mes na e negoshi di telefon selular.
“E tempu ei tambe mi a tende ku un di dos kompania lo mata e negoshi di selular ku UTS a kaba di kuminsá kuné. Mi ta kòrda kon UTS tabatin den kuminsamentu apénas algun mil abonado di telefon selular.
Awendia e kantidat di abonado a krese den forma inkreibel i UTS ta ganando hopi plaka. Mi ta kere ku e mesun kos lo sosodé tambe ku yegada di Columbus,” segun Adriaens.
Te awor aki ta UTS ta e úniko kompania ku kabel riba e sistema di konekshon internashonal, Tur hende mester pasa via UTS. Den kaso di Columbus, e kompania ta disponé di su mes kabel i e ta bai ofresé mas servisio.
“Ami ta kere ku preis di Internèt lo bai baha. Den e kaso aki no ta UTS ta e intermediario. Komo minister mi a bisa semper ku tur 150 mil kas na Kòrsou mester por disponé di Internèt ku spit haltu.
Awor aki nos ta kalkulá ku tin un 10 mil hende ku Internèt, pero ku spit haltu ta mas o ménos mil hende so. Si baha tarifa di Internèt, muchu mas tantu hende lo por probechá di e fasilidat di Internèt,” minister Maurice Adriaens a bisa finalmente.