WILLEMSTAD - Segun minister di Hustisia David Dick, lamentablemente nos ta biba den un kultura kaminda tin un porsentahe haltu di mayornan ku no ta kumpli ku nan obligashon di duna alimentashon. Esaki ta e motibu ku Ofisina pa Bienestar di Mucha a adaptá e proseso pa garantisá e obligashon aki. Entrante promé di ougùstùs tur mayor kaminda e yu ta keda i ku tin problema pa risibí alimentashon mester buska un desishon di Korte. A base di e entrada di ámbos mayor Wes lo stipulá e montante korespondiente pa e alimentashon. Lei no ta hasi distinshon di yu rekonosé òf nò. Tur mayor mester kria nan yu.
Práktika na Ofisina di Bienestar di Mucha a mustra ku den mayoria kaso mester komprometé e tatanan legalmente pa nan kumpli. Hopi ta e kasonan tambe ku ta kuminsá kumpli boluntariamente, pero na kaminda ta stòp òf no ta kumpli debidamente. Ku e desishon di Korte Ofisina pa Bienestar di Mucha por tuma pasonan legal pa risibí e pago i sòru pa esaki yega su destino. Ta bon pa bisa ku tin vários tata ku si ta kumpli kabalmente i nan mes ta kana e kaminda di Ofisina pa Bienestar di Mucha pa atendé e pago. Di e forma aki nan tin un komprobante ku nan a paga pa evitá kualke konfushon òf informashon ku no ta kuadra.
I naturalmente tin mayornan ku tin bon palabrashon ku otro i ku no mester di intervenshon.
No tin ningun gastu mará na e desishon di Korte. En prinsipio no tin mester di un intervenshon di abogado ni otro instansia pa yuda ku e petishon. Korte lo trata e kaso i tuma un desishon denter di algun siman. Esaki ta nifiká ku e yu lo no ser perhudiká pa un temporada largu manera ta e kaso aworakí. Den kaso ku un mayor ta preferá di haña yudansa, Ofisina pa Bienestar di Mucha lo sigui duna sosten na e mayor den forma di yudansa pa yena e petishon, ku informashon i otro konsehonan. E Ofisina lo kontinuá ku su tarea di kobra i paga alimentashon.
Segun Minister no mester lubidá ku ora no kumpli ta e mucha ta perhudiká. P’esei mes e ta kontentu ku e desishon i ta pará tras di e proseso adaptá di Ofisina pa Bienestar di Mucha. Esaki ta nifiká ku tur mayor lo kumpli ku nan deber di kria nan yu banda di e deber di duna bon edukashon. Di e forma aki ta kumpli tambe ku e tratado Internashonal di Mucha vigente.