WILLEMSTAD/DEN HAAG – Un munisipio no tin mag di duna un pèrmit pa un evento grandi si no tin sufisiente polis disponibel. Esaki ta loke e bònt di polis ACP na Ulanda ta bisa. E posishon akí e bònt ta asumí despues di disturbionan ku tabatin durante un aktividat grandi, ku a kulminá den persekushon di tres polis.
Segun e presidente di e bònt di polis, Gerrit van de Kamp, un maneho di pèrmit adaptá ta nesesario pa evitá ku polisnan ta haña nan mes den un ‘situashon penibel’ manera nan koleganan despues di e Oranjefeest na Pijnacker na mei 2006. E aktividat a sali kompletamente for di man despues ku a para e fiesta promé ora debí na un bringamentu. Un grupo grandi di esnan ku tabata na e fiesta no a reakshoná riba òrdu di polis pa bandoná e tereno. Polis a aktua ku man duru. Den e káos diferente bishitante i kuater polis a resultá heridá. Segun investigashon di reshèrshi a usa muchu klòp na muchu okashon i a aktivá e brigada di kachó muchu lihé.
Wes a mustra durante e kaso kontra e tres polisnan, ku nan mester a hasi nan trabou bou di sirkunstansianan difísil. Organisashon di e fiesta i e kalkulashon di e riesgonan delantá a laga hopi di deseá. Pa esnan detené tabatin lugá solamente den bista di e otro bishitantenan, loke a sòru pa eskalashon. Segun e presidente di e bònt di polis ta na su lugá ku wes a wak e otro partidonan tambe na un manera krítiko.
Un polis di 35 aña di edat a sali kompletamente for di su buki ora e kier a manda un hòmber fuma bai for di e sitio. E polis a dal e por lo ménos 7 bia ku un klòp largu (kinsena), miéntras no tabatin menasa di parti di e hòmber. Wes a sentensi’é pa ekseso di violensia i e mester paga un but di 750 euro. Tabata e úniko kaso den kua wes a duna Ministerio Públiko rason. En total tabatin 3 polis ku mester a presentá dilanti di wes relashoná ku 6 keho di maltrato i 1 di abuso di poder. Ministerio Públiko a pidi kastigu alternativo i but.
E bònt ke sinta na mesa ku minister Guusje ter Horst di Asuntunan Interior.