Prof. Sheik Lorito ta yama tur hende un felis djabièrnè. Ougùstùs a dal aden asina aki. Nos a tira 7 luna nos tras ku a bula manera e paranan mas lihé ku nos. Zjuuuuut....7 luna a pasa. Lorito ta kontentu ku ougùstùs a yega pasobra ta luna di fakansi pa Lorito, Weganan Olímpiko i otro festividatnan!
****
Lorito a pasa wak e konferensha di prensa ayera di Gensley na Trupial Inn. Ta bon pa mira kuantu sosten un direktor tin. Esei sigur ta un punto ku mester tene kuenta ku ne. Nos a mira personalmente kon diferente trahadó (di abou te ariba) a bin duna nan direktor un man pa sosten i pa pidié wanta duru. Nos no sa mira e kosnan aki masha.
****
Por lo general bo ta haña e tipo di situashonnan aki den kompanianan kaminda kosnan tabata kana robes i e personal tabatin un kultura di aktua robes. Ora ku bin kambio semper ta bin resistensia komo ku hopi trahadó no sa ku ki aktitut e direktor nobo ta bin. Anke ayera esei no tabata e kaso, ta bon pa tur hende sa (Gobièrnu, Hunta di Komisario, STIP i otronan) ku trahadónan ta para tras di nan direktor! Esei tambe mester pisa den e totalidat!
****
Tòg nos a keda ku e impreshon ku a aktua demasiado for di konteksto. Lorito ta kere ku enbèrdat por hasi un investigashon sin ku gerensia ta stroba. Ademas, si mester a saka informashon for di e kompania, lo a hasié masha dia kaba. Ta bon pa apuntá tambe loke Gensley a bisa: 5 miembro diferente di e kompania a firma e kontraktnan! Por ta einan un investigashon pa determiná proseduranan spesífiko (por ehèmpel ken ta outorisá pa firma) ta na su lugá!
****
Lorito lo kier a mira tambe un investigashon mas amplio den e tipo di kasonan. Nos ta kere ku mester skrutinatur kontrakt na tur kompania i fundashon di gobièrnu. A bira pa nos kaba “for once and for all” ku henter e asuntu di kontraktnan aki ku awor aki no ta algu masha transparente. Nos ke sa ken ta tras di kua kompania, si tabatin destaho públiko, kon largu e kontraktnan ta dura i si tin konflikto di interes. Nos tin sigur ku lo tin masha hende spantá.
****
Ku tur rèspèt pa Gensley Capella i su konferensha di prensa “a titre personnel”, manera e mes a bisa, nos no a gusta ku trahadónan a bin sinta den e sala. Esei ta stroba prensa hasi su trabou pasobra bo ta sinti ku bo no por hasi preguntanan krítiko. Nada kontra pa personal bin serka di e sala, pero no DEN e sala kaminda tòg bo ta sinti manera un rosea kayente bo tras. Pens’é!
****
Awe ALM/DCA lo a kumpli 44 aña. Mester tabatin un aktividat awe mainta pa kita e último avion di e kompania for di tereno di aeropuerto pero e no a sigui. ALM/DCA ta trese hopi rekuerdo ainda. Piká!
****
Mas hóben ta enbolbí den krímen, prinsipalmente ku arma di kandela. Lorito den su bida no a mishi nunka ku un arma di kandela. Nan a splika nos ku ta un metal masha friu. Lorito tin su edat kaba pero tin grupo di hóben ta kana awendia ku arma manera nos tabata kana ántes ku bals den saku. Nos por sigui asina aki?
****
Nos ta keda te aki awe. Kuida kurpa. Kòrda ku luna ta largu....! Te mañan ku Dios su poder!