WILLEMSTAD – Polis a detené por lo ménos 33 hóben menor di edat den e promé 7 lunanan di e aña akí pa diferente tipo di krímen. Di e kantidat akí a detené 9 den e último 2 lunanan, sospechá di ta envolví den sea asesinato, atrako, poseshon di arma di kandela ilegal i/òf sekuestro.
E 33 detenshonnan akí ta trata di hóbennan entre 14 aña i 21 aña di edat. Un hóben ta bira ‘handelingsbekwaam’ na momentu ku e hasi 18 aña di edat. Esaki ta nifiká ku for di e momentu ei e por kuminsá firma i ta bira responsabel pa su aktonan. Sinembargo ta te ku su 21 aña di edat e ta bira mayor di edat (meerderjarig). No mas ku ayera nochi un hóben di 16 aña a asesiná un otro hóben di 17 aña di edat.
E kaso tristu akí a tuma lugá den e bario Juan Domingo ayera nochi 9’or. Polis mes no a duna ningun detaye di e suseso, pero tin vershon ta indiká ku e víktima, Roly Sambo (17), lo a bai buska un baiskel na un kas den e bario mes. Na e sitio a surgi un tiramentu i un bala a heridá e víktima mortalmente. Polis a informá ku na e sitio mes nan a detené e hóben J.C. di 16 aña di edat komo sospechoso di e tiroteo. Tin vershon ta indiká ku e víktima no tabatin nada di aber ku e tiramentu, i ku ta na un mal momentu e tabata na e sitio. No ta konosí ta ken J.C. kier a tira.
E aña akí diferente hóben tabata envolví den kasonan di krímen pisá ku a kousa morto. Aña a habri ku asesinato di un hóben di 24 aña di edat. Polis a detené den e kaso akí e hóben R.H. (20). Algun dia despues e hóben J.C. (20) a asesiná su tata di kriansa, despues di a herid’é na su kabes ku un piki. Resientemente polis a detené e hóben H.M. (15) sospechá di ta envolví den e asesinato di Pim Timmermans. Tambe polis a detené e hóben F.P. (16) sospechá di a tira un dama ku un arma di kandela durante un atrako. Ta sospechá e hóben akí di ta envolví den e kaso di asesinato di Timmermans. Durante e detenshon akí polis a bai tambe ku e hóben S.R. (16) pa poseshon di dos arma ilegal. Algun dia despues a detené e hóben I.C. (19) sospechá di ta envolví den e kaso di atrako huntu ku F.P. I.C. lo a heridá un hòmber tambe ku un arma di kandela. Relashoná ku e kaso di sekuestro di e komersiante Omeis, polis a detené tambe e hóbennan J.L. (17) i L.R. (20).
En total polis a detené un kantidat di 45 hóben entre 14 aña i 23 aña di edat, i 33 entre 14 i 21 aña di edat. Ta sospechá nan di ta envolví den ladronisia, droga, inkubrimentu, anunsio falsu di bòm, intento di asesinato, poseshon ilegal di arma di kandela i labamentu di plaka. Ta trata di 2 hóben di 14 aña di edat, 4 di 16 aña di edat, 3 di 17 aña di edat, 5 di 18 aña di edat, 2 di 19 aña di edat, 9 di 20 aña di edat, 7 di 21 aña di edat, 4 di 22 aña di edat i 8 di 23 aña di edat. E datonan akí ta kompilá for di e komunikadonan di prensa ku polis sa manda.