ORANJESTAD- Ayera tardi Minister Presidente Nel Oduber a emiti un comunicado di prensa, cual ta mas dirigi pa e sindicatonan di trahadornan di WEB Aruba NV y di NV Elmar, den cual e ta trata a hustitfica e insistencia di su persona y di su gobierno, pa trece cambio den statutonan di Utilities NV.
Sinembargo den e comunicado, y den e comunicado emiti pa su Gobierno na nomber di partido MEP, ta keda confirma cu e cambionan di statuto ta solamente dirigi pa elimina director di NV Elmar, esta sr Freddy Rafini for di e puesto ey, ya cu su persona no kier coopera cu Gobierno pa traspaso di ganashi pa Gobierno.
E conflicto aki ta durando algun luna caba, y ta for di algun tempo caba Rafini ta bou di constante presion di Gobierno pa cu dunamento di “voorschot” miyonario na Gobierno di Nel Oduber.
E director di Elmar a insisti semper cu tur cos tin cu bai segun statutonan y segun reglanan existente y el a converti su mes den enemigo grandi di Gabinete Oduber IV pa e posicion cu el a tuma manera su responsabilidad ta exigi.
Awor Gobierno kier duna Hunta di Comisario di NV Elmar mas poder cu e director y via di e cambionan aki, Nel Oduber kier forza pa saca placa for di e compania di coriente pa su gobierno.
Un situacion realmente serio ya cu despues di shete aña den gobernacion di e pais aki, e situacion financiero di Gobierno ta sumamente precario, no tin placa y no tin lugar mas pa impone medida riba pueblo.
Gabinete Oduber IV no a cumpli cu su promesa atrobe di trece prosperidad pa e pueblo di Aruba, mientras cu Gobierno mes ta hibando un maneho cu no tin pia ni cabez.
A trata di forza director Rafini na tur forma pa traspasa miyones di florin pa gobierno pero no a logra y den un periodo e director hasta a haya su mes bayendo cu vacacion pa evita e constante confrontacion cu Gobierno.
Awor Nel Oduber y su gobierno kier cambia statuto pa asina su Gobierno por haya placa di e planta di electricidad sin bisa kico e consecuencianan lo ta di e compania aki.

Den carta na Directiva di U.E.A. y S.I.W.A., Premier Oduber ta reafirma
Cambionan den statuut di Elmar N.V. no tin nada di haber cu posicion legal di trahadornan

ORANJESTAD – Minister Presidente, sr. Nelson Oduber, bou representacion di Gobierno como Accionista doño di Utilities N.V., a dirigi un carta na e Directiva di U.E.A. y S.I.W.A.
E contenido di e carta ta bisa textualmente asina: Referiendo na boso orden di dia 31 di juli 2008 pa tene un reunion ariba fecha y ora cu boso ta determina, sin tene cuenta alguno cu mi agenda y obligacionnan, lo siguiente:

1. No tin cambio den Statuut di WEB N.V., ya cu esakinan a ser haci caba na 1993. E cambionan ta den Statuut di Elmar N.V. y no tin nada di haber cu boso posicion legal di acuerdo cu e C.A.O.-nan di tanto WEB N.V. y Elmar N.V. E cambionan ta pa trece claridad den e relacion di e Director y Hunta di Comisarionan pa cumpli cu nos decision di februari 2006 pa aplica e ‘Code of Corporate Governance’. Esaki a ser haci caba den e Statuutnan di AAA N.V., Arubus N.V. y Setar N.V., unda ta regla e instrumentonan pa e comisarionan por hiba un mihor control ariba e maneho di e compania pa trece transparencia.
En concreto ta cambia articulo 12, unda ta pone cu e Director mester respeta y ehecuta instruccionnan di e Hunta di Comisarionan y accionista (Gobierno). Esaki no tin nada di haber cu e miembronan di e sindicatonan.
Art. 14: regla mas cla cu e Director mester informa e Hunta di Comisarionan ora e ta ausente, cu vacacion etc. y defini e tiponan di ausencia cu por presenta. Esaki tampoco ta afecta e posicion di e miembronan di boso sindicato.
Art. 17: obligacion pa e directiva di Elmar N.V. entrega un presupuesto pa aprobacion serca e Hunta di Comisarionan. Esaki no tabata bon cla regla den e Statuut actual. Esaki tampoco tin efecto ariba boso posicion regla den C.A.O.-nan. Esakinan tur ta e cambionan di mas importante.
2. Gobierno no por discuti posicion di directornan cu sindicato, pasobra ora a nombra nan nunca a envolvi ningun sindicato. Director ta wordo nombra pa accionista cu ta gobierno. Esaki lo crea un precedente pa tur director di tur departamentonan di gobierno.
3. E fondo di pensioen ta un fundacion entre Elmar N.V. y e empleadonan cu ta participa. Nos como Gobierno y Hunta di Comisarionan na varios ocasion - a base di boso peticion - a trata na intermedia den e asunto aki, pero como doño di Utilities N.V. cu ta doño legal di WEB N.V. y Elmar N.V., nos a ser bisa cu ‘Elmar no tin ningun cuenta pa duna gobierno, pasobra e fundacion ta di Elmar y su miembronan’. Esaki boso mes por bolbe discuti cu e Director. Lo ta repiticion lo tin sin haci e cambionan grandi den e structura. Nos a recomenda boso pa consulta cu un consehero legal y un accountant pa yuda boso.
Gobierno ta di opinion cu e informacionnan aki a keda bon cla determina cu no tin cambio alguno den e posicion legal (C.A.O.-nan) di e empleadonan, pasobra esaki mester ser respeta. Nos ta spera cu sindicatonan sa di informa nan miembronan di e contenido aki.