ORANJESTAD – Den su comubnicado di prensa partido MEP ta bisa cu for di 2006 gobierno a dicidi cu lo aplica pa tur su companianan ‘Code of Corporate Governance’ den Statuut di e companianan aki, locual a sosode caba den AAA N.V., Arubus N.V., Setar N.V. y awor ta na turno Elmar N.V. Ta bon conoci cu e structura di Elmar N.V. no ta cumpli cu e normanan di transparencia y di duna cuenta na e Hunto di Comisarionan. No esaki so, ni awor di acuerdo cu e Statuut e director no kier cumpli, scondiendo cada vez tras di tramitenan legal y creando un ambiente masha hostil, arogante, sin respet pa e comisarionan di dicho compania y constantemente ta den ‘clinch’ cu esnan cu mester controla e compania. E cartanan di e director di Elmar ta un muestra di un actitud intransigente contra e verdadero doño cu ta gobierno, esta pueblo. Mas cu 2 aña largo gobierno y e comisarionan a carga pasenshi cu na caminda e director lo por realiza cu cos mester cambia.
Desde inicio cu a cumpra Elmar N.V. a keda palabra cu e ‘leading bank’ N.I.B., cu 10 aña largo lo no mishi cu e structura di e compania. Awe nos ta den un situacion hopi diferente, unda e structura di e Holding, Elmar N.V. y WEB N.V. a sirbi nan proposito pa e tempo cu nan a ser funda, pero no den e mundo transparente cu nos ta bibando aden. No lubida cu ambos director a haña 7 aña caba di gobierno pa prepara pa e temponan dificil di desde 2005 un aumento den prijs di petroleo, fuel oil etc.
Gabinete Oduber a anuncia na 2001 cu lo bin cu mulinanan di biento na Vader Piet y awe 7 aña despues gobierno por lesa den corant cu un compania ta bay bende WEB N.V. coriente y na su turno WEB lo bay bende coriente cu Elmar. Bo mester puntra bo mes pakico asina hopi tempo?
Na inicio di nos gobierno nos a dicidi pa WEB N.V. – mirando e calidad di awa – cu nan mes yena botter cu awa y bendele como bon awa. WEB a bisa gobierno cu economicamente e no ta factibel, pero despues un otro compania priva si a haci’e aparentemente factibel.
Cambio di Statuut di un compania di gobierno como doño ta un responsabilidad exclusivo di gobierno. Kico en esencia ta e cambionan cu no tin absolutamente nada di haber cu e posicion di e trahadornan di Elmar?
1. Den articulo 4 te 10 mas bien ta formula mas skerpi e condicionnan di venta di e accionnan.
2. Den articulo 12 a pone claramente cu e director mester respeta instruccionnan di e Hunta di Comisarionan y di e accionista. Esey segun nos ya ta e caso caba bao di e Statuut actual, pero pa evita discusion innecesario tocante di e interpretacion e cambio aki ta necesario.
3. Den articulo 14 a stipula cu e director mester informa e Hunta di Comisarionan ora cu e ta ausente y al mismo tempo a duna un definicion di e tiponan di ausencia cu por presenta. Esey como cu e interpretacion di ley no ta suficientemente cla ariba e punto aki.
4. Den articulo 17 a introduci e obligacion di e director pa entrega na Hunta di Comisarionan un presupuesto pa nan aprobacion. Tambe den e articulo aki a stipula claramente cu e director mester duna e Hunta di Comisarionan e informacion necesario pa nan por haci nan trabao di vigila y controla. Segun nos esaki ta e caso caba bao di e Statuut actual, pero practica a mustra cu ta mihor pa trece e cambionan pa evita boycot y discusion innecesario.
Cu Presidente di U.E.A. kier kita awa y coriente pa e democracia y transparencia aki ta un mal señal of tin miedo pa duna cuenta. No lubida cu directornan di Elmar y WEB pa hopi aña por a haci y deshaci bao di pretexto cu si gobierno mishi, N.I.B. lo yama e prestamo, esta mester paga back tur e placanan fia den solo biaha. Tempo di sconde tras di N.I.B. a pasa y si un director no kier duna cuenta na esnan apunta pa gobierno pa controla y vigila, anto e tin un mentalidad robez. E pueblo mester por sa con tur negosacion ta bay pa cumpra material y pa haci trabaonan den WEB y Elmar. Si pa esaki kier kita coriente y awa, anto e mentalidad ta robez. Gobierno tin masha tempo ta soporta hopi falta di respet, pero esey mester ta pasado. Pueblo sigur lo beneficia di mas cambio cu mester bin, unda WEB desde 2005 ta absorba te 12 ton di awa e tarifa di 35 dollar, mientras awe e prijs di fuel oil ta 115 dollar, un subsidio pa pueblo di 80 dollar.