Oficina di Monumento y Minister di Cultura cu elogio

ORANJESTAD- Ayera diabierna 1 di Augustus 2008, sr. Hugo Mohamed a celebra cu su persona a cumpli 35 aña den servicio di gobierno. Pa e ocasion special aki sr. Mohamed a keda ricibi door di Minister di Cultura sr. Tai Foo Ramon Lee na su despacho pa conmemora e acontecimento special aki. Despues di un conversacion ameno Minister Lee a honra sr. Mohamed cu un carta di gratitud y alaves a entrega e costumbrado envelop den precencia di directora di Oficina di Monumento, sra. Ing. Yvonne Webb- Kock.
Sr. Mohamed a drenta gobierno na 1973 y a cuminsa traha como docente na Martin Luther King School te 1996. Durante e periodo aki e tabata docente den “Werktuigbouwkunde y Mechanische techiek”. Tambe 6 aña largo su persona a duna les den e materia Spaño. Na Mon Plaisir Mavo y Juliana School a duna les den Scheikunde.
Na ana 1996-1998 sr Mohamed a elabora como coördinador di Ministro di Deporte. Di 1998 te 2000 e a wordo poni na disposicion di Ministro di asuntonan Economico.
Na aña 2000 sr. Mohamed a haña un traslado pa Oficina di Monumento y a wordo poni na disposicion di Fundacion Fondo di Monumento na unda e a fungi como Director Interino. Na aña 2001 sr. Mohamed a regresa bek na Oficina di Monumento na unda e ta encarga cu maneho y alabes ta dirigi e buitendienst di Oficina di Monumento. Su funcion actual ta “Beleidsadviseur” y ta alabes e Director Interino di Oficina di Monumento.
Sr. Mohamed a celebra su 35 aña den servicio di gobierno hunto cu su coleganan na Oficina di Monumento.
Sr. Mohamed ta un trahador ehemplar y ta e deseo di Oficina di Monumento cu e por eherce su trabao akinan pa hopi añas mas.