WILLEMSTAD – E hóben J.C. di 16 aña di edat ku a heridá su amigu Roly Sambo (17) mortalmente ku un arma di kandela ta yu di un polis di fam Cijntje. Bisiñanan a yama ayera tardi durante un programa na Z86 i duna e informashon akí. Tambe nan a informá ku un otro yu lo tabata den problema ku hustisia anteriormente.
E suseso lamentabel a tuma lugá djaweps anochi den e bario Juan Domingo. Durante un entrevista na e mesun emisora ayera, e bosero di kuerpo polisial a deklará ku e no ta na altura si a lokalisá e arma di kandela. Tambe el a refutá enérgikamente ku ta for di un outo ku a pasa a lòs e tiru ku a mata Sambo. Mas informashon di e suseso e bosero no por a duna. El a splika ku J.C. ta detené i ku e ta dunando deklarashonnan di loke a pasa.
E kabes di skol di MIL kaminda e víktima tabata alumno, a splika na Z86 ku ta trata di un alumno hopi ehemplar ku nunka no a presentá den kantor di e kabes di skol pa niun problema. Segun Erwin Koster di MIL, e hóben tabata hopi gustá serka su koleganan di klas 4 di HAVO. “Mi mes no a mira e hóben nunka den mi kantor. Normalmente ta alumnonan ku no komportá nan mes òf ku haña nan mes den un òf otro problema sa presentá den mi kantor. Tambe ta sosodé ku alumnonan ku hasi algu èkstra ordinario ta presentá den mi kantor. Den kaso di e alumno Roly Sambo esaki no tabata e kaso. Ta for di mi dosentenan mi a komprondé ku e tabata un alumno ehemplar i hopi kerí na MIL”, Koster a bisa.
Roly ta bira e di tres alumno di MIL ku ta fayesé den e último tres añanan. “Aña pasá un alumno di nos a bira malu den fin di siman i a muri direpente na hòspital. Dos aña pasá tambe nos a pèrdè un alumno. Den su kaso nos no a haña sa nunka mas kiko a pasa. Aktualmente nos ta bai prepará pa asina skol habri otro siman nos hasi algu na memoria di Roly Sambo.”