Skina di Sorti, awe djasabra 19 di yüli di 2008, ta kuminsá ku deseá tur hende un bon dia. Den negoshi i polítika bo mester ta determiná (“resoluut”) den tomo di desishon pa bo por logra kambio efektivo den un tendensia negativo. Bo tin di mustra e determinashon pa tuma bo pèrdida, laga lòs i enkaminá e direkshon nobo ku un “nieuw elan”. Tantu MAN komo FK no a demostrá esaki pa lokual ta e aliansa polítiko ku mester wòrdu konsiderá komo un frakaso rotundo.
****
No por papia di un mobilisashon ku tabata tin sierto grado di éksito pero ku pa motibu di un insidente mester a wòrdu reposishoná. Tabata tin kestion di un mobilisashon dòrna ku insidente molestioso sin nada di gara serka e masa. E tema pa kual e forga e aliansa no ta biba, miéntras e profilamentu tabata mas pa e grupo minoritario ku pa esnan ku mas sosten (“draagvlak”) den komunidat.
****
Si bo wak kual ta e faktornan kritiko pa éksito di un mobilisashon sosial, e konklushon no por ta otro ku e aliansa tabata un flòp. Un mobilisashon sosial por ta outónomo òf e por ta indusí. Pa un mobilisashon sosial por wòrdu indusí ku éksito, e organisadónan mester a konstruí un sistema di komunikashon efektivo ku kual por alkansá e masa. Banda di esaki, e organisadónan mester skohe e mihó momentu i e tema adekuado pa inisiá e mobilisashon.
****
Komo ku e tema no tabata biba i aktividat no polítiko no tabata esun ku a redonda den akshonamentu polítiko, no por papia di un mobilisashon outónomo pero unu indusí. Un mobilisashon outónomo ta surgi na momentu ku un “triggering event” kousa erupshon di un tenshon kousá pa un situashon di krísis. E dimenshon i dinámika di e mobilisashon ta dependé di presensia di nètwèrk di komunikashon i di hendenan ku ta rekonosé e oportunidat pa asumí posishon di poder.
****
Pues si a akshoná ku e tema di deterioro sosial (oumento di kosto di bida, falta di determinashon den tomo di desishon polítiko riba esaki), por a propulsá un mobilisashon outónomo. Pero a keda ku e tema morto (serka e masa) di proseso estatal i a trata di usa e malestar sosial komo un aselerador. Un aselerador no por lanta morto.
****
Básikamente un mobilisashon sosial tin 4 karakterístika esensial. Na di promé lugá un ret di komunikashon. Na di dos lugá e ret di komunikashon mester por wòrdu adoptá i integrá ku e ideanan di e movementu. Na di tres lugá mester tin malkontentu òf inkomodidat molestioso ku ta okashoná un situashon di krísis i finalmente mester tin desaroyo di liderazgo òf apoderamentu di liderazgo.
****
Den kuadro di e aspekto di koheshon ku mi a ilustrá den algun kolumna previsio, por bisa ku un mobilisashon por ta eksitoso ora ku un grupo grandi ta koinsidí riba “issue”. Òf den otro forma bisa, na momentu ku un grupo grandi ta interpretá e indikashonnan konstatá den e mesun forma. E ora ei ta surgi un situashon kaminda ku bou di liderazgo ta formulá un ideologia ta adoptá un strategia i ta figa metanan ku mester wòrdu alkansá.
****
“From their own experiences, directly and concretely, people feel the need for change in a situation that allows for an exchange of feelings with others, mutual validation, and a subsequent reinforcement of innovative interpretation. Nothing makes desire for change more acute than a crisis. Such a crisis need not be a major one; it need only embody collective discontent”
****
Di su mes un situashon di malkontentu no ta resultá den un mobilisashon. Bo tin mester di liderazgo. “Some protest may persist where the source of trouble is constantly present. But interest ordinarily cannot be maintained unless there is a welding of spontaneous groups into some stable organization. In other words, people must be organized. Social movements do not simply occur”.
****
Ta bèrdat ku e lider den e fase inisial ta keda tras di kòrtina. Pero esei no ta nifiká ku un otro tin di profilá komo lider. E ta krea e persepshon robes ku e mobilisashon a kue forma, ta organisá kaba i ku t’e ta e lider. “In the early stages of a movement, it is the organizer much more than any leader who is important, and such an individual or cadre must often operate behind the scenes”.
****
Pa lokual ta e ret di komunikashon tambe a kometé fayo garafal. Esnan ku ta lider no tabata tin kòntròl riba e instrumento mayó di komunikashon. Banda di esei e instrumento di komunikashon sentral di e mobilisashon a traha kontra produktivo. El a sirbi pa krea ménos reseptividat otro kaminda.
****
Kestion di bini ku protokòl i amplia e base dje aliansa ta akshonamentu ku na di promé lugá ta basa riba un frakaso i na di dos lugá no ta kondusí na progreso den direkshon di e faktornan kritiko pa éksito. E úniko desishon sensato mester tabata di aseptá e frakaso, i retrosedé pa prepará pa un otro oportunidat. “To retreat for a better position”. E promé akshon mester ta esun di traha riba un ret di komunikashon.
****
Un otro aspekto ku MAN i FK mester komprondé ta ku no ta eksistí liderazgo kompartí den un mobilisashon. Bo tin lider i “chain of command”. Den su tempu, Errol Cova tabata “el comandante”.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.