WASHINGTON – E kampañanan presidensial di Barack Obama i John McCain a interkambiá akusashon mutuo pa motibu di a introdusí e tema rasial den e debate presidensial i a kulpa otro pa e tono negativo kresiente di nan publisidat.
McCain a akusá Obama di ta hasi polítika di nivel abou ku e tema rasial ora el a pronostiká ku e senador republikano lo ta trata di spanta e votadónan ku e afirmashon di ku e kandidato demokrat “no ta parse e otro presidentenan di e biyetenan di dòler”.
E konsehero di Obama David Axelrod a indiká ku e tema di rasa a sali fo’i man únikamente ora e kampaña di McCain a kritiká e komentarionan formulá djarason pa e senador di Illinois, di ku si e yega Kas Blanku lo e bira e promé presidente di koló di e pais.
E gerente di e kampaña di McCain, Rick Davis, a akusá Obama djaweps di ta “hunga e sentro di rasa”.
Pero, Obama no a aklará su komentario di djarason ora el a referí su mes na e imágennan di e presidentenan merikano ku ta aparesé riba e dòlernan di papel, nan tur ta blanku, manera George Washington, Abraham Lincoln, Andrew Jackson i Ulysses S. Grant. Nan tur, ménos Grant, tabatin mas aña ku Obama dianan a yega na presidensia.
McCain no a menshoná e tema di rasa den su kampaña elektoral, ounke el a ser kritiká pa a vota kontra un proyekto di lei ku ta deklará dia di fiesta federal e fecha di nasementu di e pastor di koló asesiná Martin Luther King. Despues el a rekonosé ku tabata un eror di a bai kontra e proyekto.
“Nos lo no konsentí ku niun hende lo saka e potrèt di John McCain, kende a lucha henter su bida pa igualdat di derechonan pa tur hende, komo un rasista”, Davis a bisa djabièrnè na e kanal di televishon NBC. “Ya nos a mir’é na otro okashonnan i nos lo no konsentí pa e bolbe ripití”.
E tim di McCain djabièrnè a publiká su último video riba Internèt, titulá “Barack Obama a lubidá Amérika Latina”. E video ta señalá loke tabata hasi falta den e diskurso di Obama komo siudadano di mundu: menshon di algun pais o siudat di Amérika Latina. “Komo siudadano di mundu, Barack Obama a keda sin menshoná un region importante”, e video ta denunsiá.
Axelrod a rechasá e akusashon i a ripití ku Obama tabata referí na su tiki eksperensia den senado di Merka, ménos ku tres aña, i no na su rasa.
“Barack Obama nunka a yama John McCain rasista”, Axelrod a bisa na e kadena CBS.