GOIANIA, Brazil – Un hóben brasileño ku supuestamente a konfesá na polis e asesinato i mochamentu di un menor ingles, a afirmá djabièrnè ku e tabata demasiado drogá pa rekordá loke el a hasi na momento di e krímen.
“Mi no ta kòrda mashá, mi tabata muchu drogá”, e brasileño Mohammed D’Ali Carvalho dos Santos a bisa AP for di su sèl di 2x5 meter na warda di polis di Goiania, 200km wèst di Brasilia, kaminda e ta detené for di djaweps.
El a bisa ku el a usa ‘crack’ (beiz) i kokaina djasabra anochi ora supuestamente el a hinka e hóben ingles Cara Marie Burke di 17 aña, promé ku el a kita su kabes i kòrta su kurpa na pida.
E bòdi a ser haña den un valis na kantu di un riu serka di Goiania, miéntras ku e sobrá a ser tirá den un riu, na 20 km for di e siudat.
Ora a puntr’é kon e ta sinti pa e echonan di kual ta akus’é, el a respondé “malu, hopi malu”, i el a atmití ku e anochi dje krímen el a bringa ku e mucha muhé, kende el a konosé na Londres. E mama i ruman hòmber di Carvalho ta biba na e kapital ingles.
Djabièrnè mainta Carvalho a ser hibá na un brùg riba e koriente di awa kaminda el a tira kuater saku di plèstik ku e kabes, brasanan i pianan di Burke, miéntras un tim di reskate di bomberonan a rondia e aria pa buska restunan.
Ora nan a yega na e lugá, Carvalho a kontestá periodistanan rabiá, kendenan a puntr’é na unda el a tira kurpa dje hóben. “Ma tir’é na boso kas”, el a bisa.