CARTAGENA, Colombia – Presidente Alvaro Uribe djabièrnè gradisí Venezuela pa e kaptura i deportashon e siman aki di un supuesto miembro di e rebeldenan di FARC.
Gabriel Culma Ortiz, un supuesto miembro di FARC a keda deportá djaweps pa outoridatnan venezolano pa Colombia. Culma, alias “Guillermo” a keda detené 26 di yüli pa Warda nashonal venezolano na e estado na frontera di Amazonas.
Despues ku outoridatnan venezolano a haña sa dje detenshon, Culma a keda entregá na polis ku a hib’é Caracas pa determiná su identidat i nashonalidat.
Embahada di Colombia na Caracas a entregá e antesedentenan penal i hudisial di e detenido i a konkluí ku e tabatin pendiente un òrdu di kaptura for di febrüari 2007 pa delitunan di rebelion, segun e minister venezolano Tarek El Aissami a bisa.

--
Hopi hende a rekòrdá kaida di un brùg na Merka

MINNEAPOLIS – Algun shen hende, for di funshonarionan di estado te asta sobrebibientenan, a asistí djabièrnè na un seri di seremonia pa e promé aniversario di e kaida di un brùg na Minnesota.
Un seremonia interreligioso di un ora a tuma lugá den basílika di Santa Maria, na Minneapolis. E kor dje iglesia a eligí pa e seremonia un kansion titulá “I need you to survive” (Mi tin mester di bo pa sobreviví), i un grupo di indígenanan merikano a toka tambú.
Durante e seremonia a resa plegarianan kristian, hindú, hudiu i musulman.
E brùg a kai riba Riu Mississipi poko despues di 6’or dia 1 di ougùstùs 2007. Diestres persona a muri i 145 a resultá heridá.