Lorito ta yama tur hende un felis djasabra. E djasabra aki a bira diripiente un djasabra masha muhá. Lorito mester a dèk masha pa nos no muha nos alanan.
*********
Siman ta sera ku un gran kantidat di interogatorio riba e kaso Curoil. Lorito ta kere ku e direktor no a hasi su mes un gran fabor. Den promé instansia el a para duru i awor nos a komprondé, ku tòg el a bai di akuerdo ku e fakansi ku a imponé riba dje. E kos a keda masha erátiko. Nos tabatin gana di sa kiko korte tabata pensa di e desaroyonan na e kompania. Di tur manera ta parse ku Earl i su hendenan a gana e promé rònt.
*********
Nos mester bisa ku ta masha kos a kuminsá sali na kla diripiente. Lorito a komprondé, ku e hendenan di LA PRENSA a haña un karta kayente di un di e trahadónan. Parse ku e kompania ke bin ku un sistema kaminda tur hende ku sali for di e kompania no por bai prensa. Lorito a komprondé, ku e kos aki tin diferente trahadó masha preokupá. Nos por imaginá nos mes, ku un hende por haña órden pa no bai traha na un kompania ku ta traha den e mesun área pa sierto kantidat di aña, pero asuntu di pone prohibishon pa papia si ta bai demasiado leu.
*********
Nos no a komprondé tampoko, di kon diripiente e eks funshonario ku a bai, bin bèk, awor a bolbe bai. Niun hende no kier papia riba e kaso. Lorito a komprondé, ku el a bai mainta i e otronan a bai atardi. Kiko ta bèrdat nos no sa, pasobra niun hende no ke papia. E siman aki tabata su último dia komo konsultant na e kompania. E tabatin un kontrakt di dos aña, di manera pues ku tin basta pregunta rondó di e kaso aki. Nos lo bin bèk riba e desaroyo aki.
*********
Parse ku hopi hende tabata sa ku un di e integrantenan di e duo ku a kue Curoil kabes abou, tabatin un yate masha luhoso. Na su man e tabatin un di e djamantanan mas grandi na mundu i su Rolex tabata mesun karu ku di un otro hende serka di dje. Ademas e tin un Audi, un SUV i un otro outo mas. UN estilo di biba di kaviar.
*********
Ora un hende ta traha na Curoil, nunka e por tin tantu kos luhoso asina aki. Laga nos asumí ku e mener ta gana 15 mil florin pa luna. Nunka e por yega pa relativamente hóben ku e ta, na e kosnan aki, a ménos ku e ta yu di mionario, el a gana lotto òf haña un herensia. A bin ku un storia ku e tabatin un pòmp di gasolin na Miami. Tambe ta kos pa investigá!
*********
E siman aki un reportero a puntra Gensley, si el a yega di biaha riba e yate di Maldonado. El a bisa, ku apsolutamente esei no tabata e kaso. E yate yama Bob Marley i sa partisipá na kompetensianan di piskamentu na Kòrsou. No mas ku e aña aki, e tim a gana e promé premio na e kompetensia di Blue Marlin. Ai Lorito, bo ta papia demasiado! Lebumai nos!
*********

Foto lorito

Lorito a bula wak si e ta mira antiano òf arubiano den botonan di Gay Pride. Ta na momentu ku nos a sera, ainda nos no a haña sa si Paul tambe tabata presente. Jan-Peter a disidí, ku e no ta bai loke a krea masha konmoshon.
*********
Djaluna nos lo tin mas di tur kos pa bo. Kuida kurpa. Awor hasta awa ta diskriminá i ta kai den sierto bario so. El a keda manera koriente ku ta bai (hopi) den sierto bario so! Lebumai nos! Te djaluna awor ku Dios su poder!