WILLEMSTAD – Un biaha mas nòmber di Antia ta den notisia internashonal, despues ku a resultá ku e kompania ku ta sentro di e skandal ku a pone promé minister di Israel Ehud Olmert baha e siman aki, ta registrá na Antia. E kompania yama ImageSat International N.V. i ta registrá na Kámara di Komersio.
E promé minister di Israel Ehud Olmert a anunsiá e siman aki, ku e lo renunsiá despues ku su nòmber a aparesé den e skandal aki di soborno. Ta investigando diferente e kaso den kua e mandatario a tuma algun 100 mil dollar di un komersiante israelí residensiá na Merka. Awe polis a tende Olmert pa di 4 biaha den e kaso aki. E testigu prinsipal di hustisia den e kaso ta e komershante Morris Talansky di Woodmere na Merka. Talansky, un rabi òrtodòks, a pone kos kuminsá lora na momentu ku el a señalá e kompania ImageSat International N.V. a hiba un mal maneho i a kometé aktonan di froude. Talansky, miéntras tantu ku diferente akshonista a kuminsá un kaso pa nan haña nan sèn bèk di e kompania. Nan ta eksigí algun shen mion dollar. E kompania ta spesialisá den benta di ekipo sofistiká di opservashon ku satélite. Dos kompania grandi di defensa i aérospashal di Israel ta akshonistanan di ImageSat. Un di nan ta propiedat di gobièrnu di Israel.
E akshonistanan a pensa di kuminsá e kaso di demanda na New York, pero e siman aki wes Denis Cote a disidí ku New York no ta e lugá adekuá pa e kaso aki komo ku e kaso ta kompliká i e gastunan ta haltu. Komo ku ta trata di un kompania ku su base ta korporashonnan na Israel ta mas lógiko pensa ku nan bai sigui e kaso na Israel, asina e wes a bisa.
Segun e wes, maske ku mitar di e demandantenan ta biba na Merka, Talansky ta doño di un apartamentu na Yerusalèm i ta biaha konstantemente pa Israel pa atendé su negoshi. Ta bin aserka, ku hopi di e prueba den e kaso aki ta na Israel. E wes ta bisa, ku e ta kere ku ni New York, ni Antia kaminda e kompania ta establesé ta un bon lugá pa e kaso. P’esei el a rekomendá nan bai Israel. Miéntras tantu un abogado di Talanski a informá, ku a apelá e desishon di wes Cote, pasobra nan ta insistí pa e kaso sigui na Merka mes.