WILLEMSTAD - Gobièrnu a konstatá ku tin abusu a bin ta tuma lugá ku transporte eskolar. Anto den kuadro di mas efisiensia i ménos desperdisio,gobièrnu mester tuma desishon pa yega na un maneho mas transparente i ku ta kumpli ku normanan di bon maneho, asina diputado Marilyn Alcalá-Wallé a deklará.
Esei mes ta motibu di kon Bestuurscollege a bai di akuerdo ku e kriterionan nobo pa un famia bin na remarke pa haña transporte eskolar.
Transporte eskolar ta tópiko di hopi diskushon último dianan. Mayornan ta rabia i preokupá kon nan yu ta yega skol aki un siman ora skol habrí atrobe, e sindikato SITEK a konsiderá ku mester evaluá tur kos di nobo i tin vários persona òf instansia mas ku a ekspresá nan mes kontra e intenshon di gobièrnu.
Algun miembro di Konseho Insular tambe a hasi pregunta al respekto.
Miembro di Konseho Insular Hensley Koeiman ta un di esnan ku a hasi pregunta i a bisa ku e no por kaba di komprondé e forma di aktua di gobièrnu den e kaso aki.
Koeiman tabata referí aki na e desishon di gobièrnu di Kòrsou pa kòrta den gastu di transporte eskolar, ku a subi den forma alarmante.
“Mi por komprondé ku mester tuma medida. Pero mester a warda te awor ku skol ta bai kuminsá, pa anunsiá esaki? Nos tin un kantidat di mayor ku ta konfuso i ku no sa kon nan ta bai hasi,” asina Koeiman a splika.
Koeiman a mustra ku ta un hecho ku aña eskolar masha hopi biaha ta kuminsá ku problema. Problemanan manera skol kaminda no tin sufisiente maestro, skol ku tabata den rekonstrukshon pero ku no a keda kla na tempu, problema ku unifòrm i tambe skol ku vandalistanan a laga den un estado kaminda no por duna lès.
Banda di tur esaki, gobièrnu mes ta sòru awor pa un problema adishonal, ku ta esun di transporte eskolar, segun e konsehal a bisa finalmente.
Diputado Alcalá-Wallé sinembargo a refutá ku gobièrnu lo ta aktuando den forma iresponsabel.
“Lagami kuminsá ku bisa ku e servisio di brinda transporte eskolar ta un gesto: e no ta un obligashon di gobièrnu i e no ta para den ningun lei tampoko. Nos a sera kombenio ku un algun kompania privá ku ta transportá e muchanan di skol diariamente kontra AGO. Gobièrnu a sera tambe kombenio ku algun shofùr di bùs. Pero nos a ripará ku e gastunan a bin ta krese kaminda gobièrnu no tin un bon bista mas riba esaki,” segun diputado Alcalá- Wallé.
Banda di esei, segun e diputado, gobièrnu ta hañando reklamo di e servisio.
E servisio aparentemente ta laga hopi di deseá. Nos ta tende reklamo por ehèmpel ku e bùs ta baha e muchanan leu for di nan destino loke ta pone ku nan mester kana un bon pida promé ku nan yega.
Esei mes ta motibu tambe ku gobièrnu di Kòrsou a evaluá e reglanan di nobo i a fiha awor algun kriterio nobo
Pa kuminsá t’asina ku e mayor ku ta gana te 3355 bruto pa luna, por apliká pa transporte eskolar. Pa transporte eskolar ta bin na remarke tur mucha ku ta kai bou di e lei di enseñansa obligatorio i ku ta bishita un skol supsidiá pa teritorio insular di Kòrsou. Riba e regla último aki tin algun eksepshon.
Loke nos a hasi ta adaptá e kriterionan di manera ku gobièrnu ta kumpli mihó ku esnan den nesesidat pa e tipo di yudansa aki, segun diputado Alcalá-Wallé.