WILLEMSTAD – Kasi tur outomobilista ku a haña un klèm di wil serka S.K.S. riba e kaminda dilanti di The Movies i F.K.P., por bai reklamá e plaka ku nan a paga pa kita e klèm. S.K.S. a pega e klèmnan akí inhustu, ya komo ku for di despues di e zebrapad te na e brùg di Skalo ta pèrmití pa stashoná na man robes. Esaki por konkluí for di loke Ombudsfunctionaris a skibi den su INFO-dosis di awe.
Pa algun tempu kaba S.K.S. ta pega klèm di wil na vehíkulonan ku ta stashoná dilanti di The Movies. LA PRENSA na diferente okashon a skibi, ku esaki ta inhustu, pasó na e banda robes di kaminda, for di despues di e zebrapad te na e brùg di Skalo, no tin un bòrchi ku ta prohibí pa stashoná. No opstante e informashon akí di LA PRENSA, S.K.S. a sigui pone klèm di wil, alegando ku ta prohibí pa stashoná na man robes di kaminda. Awe Ombudsfunctionaris ta skibi den su boletin: “De bestuurder mag dus ook links op een parkeerstrook of parkeerhaven stoppen en parkeren.” Tambe e ta skibi: “Parkeren links van de weg, waar zulks gevoeglijk mogelijk is, zou dus door de wegbeheerder moeten worden bevorderd door middel van de aanleg van parkeerstroken e.d.” E frasenan akí ta parti di henter un splikashon di Ombudsfunctionaris ku LA PRENSA no a publiká integral.
Ta asina, ku nos lei di tráfiko ta bisa en bèrdat, ku ta prohibí pa stashoná na man robes. Pero e mesun lei ta bisa ku bòrchinan di tráfiko tin preferensia riba reglanan di tráfiko (verkeerstekens gaan boven verkeersregels art. 4 kap. II Verkeerstekens). Na e sitio dilanti di The Movies i F.K.P. tin bòrchi di tráfiko pone na man drechi dilanti di e edifisio di F.K.P. ku ta indiká, ku ta prohibí pa stashoná. E bòrchi akí ta konta solamente pa e banda di kaminda ku e ta poné. Entre e zebrapad dilanti di The Movies i e brùg di Skalo no tin bòrchi ku ta indiká ku ta prohibí pa stashoná, loke outomátikamente ta krea e espasio pa stashoná.
Ku e dos konklushonnan di Ombudsfunctionaris menshoná ariba, ta bon pa esnan responsabel pa ponementu di klèm di wil evaluá nan akshonnan i konkluí ku a pone e klèmnan inhustamente dilanti di The Movies i F.K.P. Mester apuntá ku e outomobilistanan ku a stashoná nan vehíkulo den e bògt ora baha e viadukto na The Movies, te ku e zebrapad, sí a kometé un infrakshon i a meresé e klèm di wil.