Skina di Sorti, awe djaluna 4 di ougùstùs di 2008, ta kuminsá ku deseá un i tur un bon dia. E opservashon kritiko di SOAB, riba e falta di diligensia serka gobernante i kuerponan representativo den atendementu ku kuentanan anual, ta un afirmashon di e deterioro molestioso i peligroso den konosementu, rèspèt i bibamentu di regla, prosedura i kustumber di nos estado di derecho. De “politiek” a krea un ambiente di un klase sosial riba su mes ku gradashon a base di voto optené, puesto okupá i tempu den funshon.
****
En bes di e preshon pa sirbi i duna kuenta i rason ante elektorado, bo ta mira mas i mas mal uso di posishon, pa gloria personal i lokual ta mas molestioso ainda un ignoransia grandi pa lokual ta e papel ku polítika tin denter di un estado di derecho. Hopi ta sinti nan mes miembro di un klase sosial ku tin privilegio legal. En bes di kuida i protehá derechonan fundamental, trapamentu di derecho a bira mas regla ku eksepshon.
****
Mal uso di imunidat parlamentario pa saka sla kontra di hende, intimidashon di miembro di kuerpo representativo i miembro di prensa pa eskivá dunamentu di kuenta i rason, matamentu di e debate polítiko (entre otro ku e wega eterno di keda sin forma quorum) i faltamentu ku reglanan di bon gobernashon ta mas regla ku eksepshon.
****
En bes di un oumento den e sensashon ku nos ta asumí mas responsabilidat i inisiativa pa atendé nos propio asuntunan, e sensashon kontrali di mas dependensia i sometementu na influensia aheno ta gana tereno. Nada di un preshon eterno pa kuida i mantené un identidat propio pero un ansha pa solushon fásil ku ta pone hendenan ku kapasidat pa rasoná ku normalmente ta riba e nivel promedio rekurí na argumentashon ku ta bergonsoso.
****
Mi a tribi na skirbi ku e lokual Bestuurscollege a pretendé di ta un “dekkingsplan” no tabata válido. Mi a skirbi ku e no tabata e kaminda for di kual bo ta haña e tipo di efekto ku bo mester pa por pretendé di tin e défisit di 2008 bou di kòntròl i den e kuadro deseá. Mi a pone komo opservashon ku e puntonan menshoná lo bai nifiká oumento di gastu temporal ku posibilidat di saka rendimentu, mas trempan na 2009. Mi a rekomendá Konseho Insular mester pa manda Bestuurscollege bai hasi su “hùiswèrk” na drechi.
****
Mi a apuntá ku kestion di realisá redukshon di e défisit finansiero di Kòrsou den kurso di 2008 ku elementonan super fluho den e aparato públiko (“overtolligheid binnen het overheidsapparaat), mehoramentu di efisiensia dor di mihó utilisamentu di rekursonan (“verbetering van de efficiëntie en het beter inzetten van overheidsmiddelen”), atendé ku dunamentu di servisio (“het aanpakken van de slechte dienstverlening door de overheid”) ta kosnan masha vago i por lo demas platonan riba e menú tradishonal di kosnan ku Bestuurscollege ta pretendé sin realisá.
****
Ora ku bo ta pretendé di logra resultado konkreto i mara den tempu (“short term”) bo mester tin ophetivonan ku ta kumpli ku e prinsipio di “smart targets”. Bo no por sigui e filosofia di “more of the same” i kosnan “too good to be true”. E sistema di presentá prosa ku aspektonan tékniko sin spesifikashon, kuantifikashon, sin desishon konkreto ku ta sostené e pretenshon i sin un plan di ehekushon, for di kual por dedusí ku lokual ta wòrdu pretendé ta realisabel denter di e periodo indiká, ta hustamente e kultura di gobernashon ku nos mester kibra kuné.
****
Bou di preshon polítiko gobernantenan lokal (te hasta esnan profeshonalmente kapasitá) sa tin e kustumber di rekurí na e táktika di blèndu komunidat ku prosa. Pero ante un “Toezichthouder” ku ta bini di e kultura gubernamental di plan supstansiá ku sifranan i desishon konkreto (“feitelijke onderbouwing”), e prosa ku bo por topa den kualke “textbook” di maneho gubernamental, no ta sufisiente. E lokual Bestuurscollege aparentemente por a blèndu prensa i oposishon kuné, “jamas de los jamases” lo por haña e “goedkeurend advies” di e “Toezichthouder”.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.