Ku masha interes mi a sigui e relato den fin di siman na BVN, kaminda a trata e problema ku tur hende ku hasi denunsia di kosnan iregular i ilegal ku nan nota den empresa, organisashon i Gobièrnu di Ulanda, ta haña nan mes aden.
Esaki maske ku ta stimulá na Ulanda pa hende ku sa di algu ku no por i ku ta kosta kaha di gobièrnu hopi plaka, pa denunsiá esaki.
Realidat sinembargo ta, segun deklarashonnan di esnan ku a hinka nan kurpa den problema dor di bisa kiko nan sa; ku na momentu ku nan hasi denunsia, nan tur a haña nan den asina tantu doló di kabes, ku loke nan a hasi ni ta kos di rekomendá.
Tur e hende hòmbernan ku a presentá den e relato a bisa ku nan a hasi e denunsia di froude i iregularidatnan, pasobra nan ke a biba ku nan konsenshi. I tur su denunsia a resultá tambe den gobièrnu kobra mas plaka di belasting ku lo e no a haña, si e iregularidat a kontinuá.
Loke a bin dilanti tambe den e relato ta, ku na Ulanda no tin sufisiente protekshon pa loke nan mes ta yamá ’klokkenluiders’, batidó di bèl pa alertá ku tin kos ta pasando ku no por mira lus di dia.
A konkluí, ku e aktual areglonan pa protehá un hende ku bin dilanti i bisa loke e sa ku ta iregular, no ta funshonando. Ta bèrdat ku tin parlamentario ulandes ku a hasi pregunta na Gobièrnu Ulandes pa haña sa dikon no ta atend’é e asuntu di alertamentu mihó. Dikon no ta protehá esun ku ta alertá. Te asta tin na Ulanda un konsepto di lei pa protehá e siudadano konsiente ku denunsiá loke e ta opservá i eksperensiá komo iregular.
Pero ta sigui parse ku esnan konserní no ta preokupá na Ulanda pa bienestar i sobrebibensia di ‘klokkenluiders’.
Miéntras ku batidónan di bèl na Ulanda ta bira masha mal mirá pa instansianan ofisial, ta asina ku na Merka esun ku alertá outoridatnan di kosnan iregular, ta sali tur benefisioso posibel. Den sierto sentido. Pasobra na Merka e batidó di bèl ta haña na final di investigashon i ku resultá ku di bèrdat e tabatin rason, un porsentahe envidiabel di e suma ku gobièrnu lo a gana na belasting. I esaki ta resultá den bira multimionario di un dia pa otro. E loke ta pasa di otro banda na Merka ta meskos ku na Ulanda: maske gobièrnu ta premiá esun ku bati bèl, meskos ku na Ulanda e ta hañ’é den un isolashon profeshonal, pasobra ta parse ku tantu na Ulanda komo na Merka no ta gusta hasidó di redu.
Pero si bati bèl na Merka ta hasibu multimionario i na Ulanda bo ta pèrdè tur kos, posishon, propiedat i te asta bo salú; ta parse ku tin un hipokresia formal na Ulanda kaminda asta tin un proposishon di lei pa protehá e batidó di bèl. No ta yud’é i protehé, pero ta kaba kuné komo hende. Na Ulanda batidónan di bèl a haña nan sintá dado momento komo sospechoso den korte i despues sentensiá den piskalat, pasobra a duda den nan denunsia, miéntras ku tur evidensia t’ei. Ke men ku ta kos di skonde mes mes tin i esun ku a kere ku e ta hasi bon, ta bira na Ulanda esun mas mal mirá ku por tin.

Pa solushoná esaki por sigui opservashon di miembro di Kas Real ulandes Pieter van Vollenhoven kende a bisa den e reportahe ku e no sa kon tin di atendé ku e asuntu di ku ora un hende bati bèl e ta hañ’é den problema i su so pará. Pero el a sigui bisa ku mester bin un organisashon independiente pa analisá e asuntunan aki......

Siguiendo desaroyonan aktual, resien i di den pasado na Kòrsou mi ta asumí ku ta hopi batimentu di bèl lo por tin serka nos kaminda leinan ulandes ta konta i kaminda kontrali na Merka bo no ta haña sèn pa bati bèl. I ta ken aki ke hinka su kurpa realmente den problema si despues di a hasi un denunsia di algu ku tur hende ku sano wisio sa, ku no por, bo hañabu sin trabou, sin kas, sin amigu i ku un ataka di kurason?
Pa mas informashon bai riba www.klokkenluiders.tv.

Bon siman i lesa mi blòg riba www. notabel .com.
Por komuniká ku Reyna Joe na info@ notabel .com.