WILLEMSTAD – Djasabra último Girobank a selebrá manera ta un tradishon riba tur último djasabra di fakansi ku tur e muchanan ku tin un kuenta di spar di Òinki na e banko. E aña aki selebrashon di Òinki tabatin e tema di deporte i for di 10or di mainta te ku 4or di atardi e muchanan por a praktiká mas ku 20 diferente deporte na Stadion Ergilio Hato (SDK). Un konklushon tin ku "Weganan di Òinki" tabata un bunita i impreshonante. Mas ku 3000 mucha a haña kaminda di SDK pa “Weganan di Òinki”.
"Weganan di Òinki" ta inspirá riba e echo, ku luna di ougùstùs e aña aki ta luna di weganan olímpiko. Girobank a transformá SDK ku tur su fasilidatnan den un paraiso di deporte, un paraiso di Òinki. Girobank a sòru pa un dekorashon masha bunita mes di e kompleho di SDK. Míles di bandera, banderin i blas a duna e mas ku 20 tèntnan rònt SDK un toke úniko. Tabatin un Òinki grandi di 5 meter tambe ku tabata impreshonante. For di na entrada muchanan a keda yamá bon bini pa hostessnan masha bunita mes bistí na trahe típiko di China. Direktor di Girobank señor Eric Garcia a bisa ku e fiesta aki na promé lugá ta pa pone den lus e poder di spar. "Kada un biaha ku tin un aktividat di Òinki, e mucha ta pasa dushi. E mesun sentido dushi aki nos ke pa e muchanan asosiá ku sparmentu. Anto ta p’esei tur aña di nobo nos tin un selebrashon di Òinki: pa e mucha por eksperensiá ki dushi ta pa spar".
Yegada di Òinki tabata den un palabra impreshonante. Deportenan den stadion a para un ratu despues ku outoridatnan a sigurá ku tur mucha tabata sintá den tribuna prinsipal ora ku tur mucha a haña e sorpresa ora Òinki a yega ku helikòpter huntu ku Assistent Managing Director di Girobank Mili Sprock. For di den altura den helikòpter Òinki i Mili tabata saludá e muchanan. Mariela Romero i Eric Garcia a buska tantu Òinki komo Mili ora e helikòpter a baha i trese nan tribuna prinsipal kaminda Giltally i Gilliard Doran a duna un presentashon kòrtiku huntu ku nan grupo di baile pero lamentablemente áwaseru a kuminsá kai nèt na e momento ei.
Pepsi a regalá tur mucha un limonada Òinki riba e dia aki. E tin sabor di bubble gum i ta koló blou meskos ku Òinki. Muchanan a gusta e smak i e lenganan ku a keda un tiki blous tabata e kick. Puntra pa e limonada Òinki unda ku bo bai ku ta bende Pepsi, paso e ta keda riba merkado. Pepsi tambe a skor haltu na “Weganan di Òinki” djasabra. Alan Maduro tambe tabata kana disfrutá di e dia i e muchanan.
Un di e weganan mas popular tabata e Oinki Jungle. Oinki Jungle ta un trayekto ku diferente opstákulo. Sala di deporte a keda transformá den un jungle kompleto ku mata, rama koko, koko, piedra, bestia, efekto di lus i huma. Mariela Romero, gerente di merkadeo i relashonista públiko di Girobank ku ta e persona tras di e idea i ku sosten di gerensia di Girobank tabatin kordinashon general di e evento ta sumamente satisfecho kon kosnan a kana djasabra. “Tur kos a kana hopi bon i for di kosnan ku a bai ménos bon semper bo ta siña for di dje pa mehorá pa un próksimo okashon. E satisfakshon mas grandi tabata di mira sonrisa riba kara di tur e míles di muchanan.
Esei mi ta garantisá tur mucha amigu di Òinki. Mi no ke keda sin gradisí tur instansia i persona ku di un otro forma a kontribuí pa e dia aki ta eksitoso. Danki spesialmente na tur e 250 boluntarionan entre otro di Sedreko i Girobank ku a duna un man djasabra”. Pabien Òinki... Pabien Girobank!