Lorito ta yama tur hende un felis djaluna. Kòrda ku Lorito ta bisa un djis ta djaluna, un djis ta otro djaluna. Bo por imaginábu ku ya kaba nos a pone 7 luna nos tras.
*********
E siman aki tin un espektativa dushi, komo ku djis aki Weganan Olímpiko ta kuminsá. Ounke Lorito ya kaba a mira un ñapa di loke ta spera nos djabièrnè awor, nos ta pendiente pa sa kon e shou kompleto lo ta. Ta parse ku China lo bai duna nos un trit global i oriental kompleto. Ban wak si e asuntu di libertat pa move i ekspresá lo no resultá un opstákulo grandi.
*********
Na Ulanda por ehèmpel tin krítika, ku despues ku tabatin tantu diskushon riba Tibèt, Ulanda a yega ku su delegashon sin masha remarke. Niun pia di palabra riba e opreshon chines na Tibèt. Otro mandatarionan ku a bisa ku nan lo no ta presente pa motibu di e situashon na Tibèt, lo t’ei manera un bolo, manera presidentenan di Merka i Fransia. Esei ta un konfirmashon mas ku tin biaha tin polítiko ku dos lenga.
*********
Siman a habri i hopi punto di siman pasá ta ketu bai pendiente. Un di nan ta por ehèmpel e situashon na Curoil ku sigur ketu bai ta di atenshon. Miéntras tantu ku tin masha poko atenshon pa e tema, mester keda riba dje, pasobra mester sa ta ken ta bai hasi investigashon. Nos a atvertí kaba ku no por hasi eror den eror. Nos ta pendiente pa sa si ta kualke kompania lokal òf internashonal ta bai hasi e investigashon (nan), si a tene destaho promé ku a duna nan e enkargo. E asuntu di “very good friend(s)” den destahonan tambe mester kaba!
*********
Un bonbiní na Goi ku ta bèk. Nos a sinti falta di su komentarionan den último simannan. Forsa Kòrsou mes ta manera kos ku a pèrdè orientashon. Nan tin gana si, pero e boluntat ta parse di no t’ei mas. E mihó kos pa FK ta pa bai uni ku un otro partido. Goi a yega i el a dal mesora e klabu riba su kabes. Meskos ku Lorito, e tambe ta boga pa hasi un investigashon na tur kompania i fundashon di gobièrnu. Asuntu di kontrakt ku esaki i esaya no mester ta eksistí mas. Transparensia kompleto! Lorito a komprondé ku tin un reunion públiko na kaminda!
*********
Anto kon a para ku e asuntu di Raad van Advies? Norbit a keda ketu, Tanchi Mè a keda ketu! Kòrda ku nos si kier sa kiko ta kiko! Asuntu di kere ku dia lo pasa i de mes lo lubidá e tema, no ta kos ku ta pasa den mente di Lorito. Kiko a pasa realmente? Tin mas ku un dokumentu? Anto di kon no ta mustra e dokumentu pa komprobá e akusashon? Laga nos sa kiko ta kiko pa nos por sera e kapítulo aki!
*********
Nos ta gosa e korant ku tur siguiente dia mainta ta kue tur nos kosnan i hasi e kosnan di dje. Nada kontra, pero kiko ta kita pa bo bisa ku ta den e korant di Lorito bo a tuma nota di sierto kosnan. E no ta kita nada for di bo. Anto e kos ta masha prèt ku ora e publikashon tin un fayo chikí si ta kore bisa ta kua medio! Tin un bon proverbio na spañó ku ta bisa ku “lo cortés no quita lo valiente! Na Ulandes nan lo bisa “ soms is het goed om te zeggen waar de informatie vandaan komt”!
*********
Nos a tuma nota tambe, ku tin por lo ménos un emisora ta djis lesa un korant mainta. Nos ta kere ku no por! Bo no por ta sinta ketu, laga otronan traha pa mainta bo yega ta hole dushi i hasi si fuera ku e informashon ta di bo. Nos sa ku e korant ta hopi preokupá pa e asuntu aki i nos sa kon atendé mas mihó. Tin un emisora tambe ta lesa tur artíkulo di LA PRENSA tur atardi sin bisa ku ta for di korant e ta lesa. No por! Lebumai nos!
*********
Nos ta keda te aki awe. Mañan nos tin pòtrèt di Miss Belize ku a resultá di ta un kurasoleño. Charmaine Chinapen awendia tin nashonalidat belizeño. Einan bo ta mira ku kurasoleñonan ta tur kaminda. Te mañan ku Dios su poder!