WILLEMSTAD – E kompania di e eks funshonario tòp di e Sentro di Transakshon Inusual (MOT) Benno van Leeuwen i su kompania, lo investigá e kaso na Curoil. E i su kompania mester raportá riba término kòrtiku. Van Leeuwen no kier a duna komentario awe mainta na LA PRENSA riba e enkargo ku su kompania Forensic Services Caribbean a haña den e kaso aki. El a bisa, ku e ta den un reunion i e no por a kontestá nos preguntanan na e momentu ei. LA PRENSA a komprondé sinembargo, ku no tin nada ta stroba e kompania pa haña e enkargo. Es mas, otro kompanianan di konsultant no ta bin na remarke, pasobra si nan haña e enkargo mes, nan lo mester buska personal spesialisá riba e tereno aki. Ta bin aserka, ku presidente komisario di Curoil Earl Balborda den bida diario, ta traha na un di e kompanianan di konsultant aki ku ta (PriceWaterhouseCoopers) i kier evitá a todo kosto ku e mesun sektor lo haña e enkargo pa no krea e impreshon di falta di independensia den e investigashon.
LA PRENSA a bai wak riba e wepsait di e kompania Forensic Services Caribbean i nos en bèrdat a topa ku foto di Van Leeuwen komo un di e sosionan importante di e kompania. Te algun tempu pasá, Van Leeuwen tabata direktor interino di MOT. Den pasado Van Leeuwen a traha tambe na Banko Sentral di Antia. Na Ulanda el a traha na polis na Politie Haaglanden. Huntu kuné tin diferente eksperto mas den investigashon forénsiko i kriminal ku ta traha na e entidat. E wepsiat ta menshoná, ku e kompania ta establesé na Kòrsou for di 1998. Te yüli 2005 e kompania tabata un supsidiario di Ernst & Young Nederlandse Antillen & Aruba, pero despues a independisá e kompania. Ta konsiderá, ku e kompania tin ekspertisio amplio riba e tereno aki i lo ta den posibilidat no solamente pa detektá kiko a pasa den e transakshonnan na Curoil, pero tambe pa wak kon e korientenan di plaka a kore den e kaso aki. Ademas nan por detektá tambe si tin kasonan similar a i ta tumando lugá na e kompania Curoil.
Forensic Services Caribbean den pasado a investigá e kaso kaminda a “delete” un gran kantidat di informashon valioso den kòmpiuternan na Tele-Kòrsou. E kaso no a haña klaridat nunka. Tele-Kòrsou a keda algun dia sin materialnan básiko di su transmishon. A sirkulá e informashon ku e porta kaminda sierto hendenan so tin akseso ku un kódigo spesial a keda habrí i un òf mas hende a drenta i mishi ku e sistema. Manera nos a bisa, e kaso no a haña klarifikashon. E mesun kompania a investigá e kaso di black-out di telefon resientemente na UTS. E kompania a yega na algun konklushon di negligensia tékniko. Minister Maurice Adriaens, ku a kuminsá su mes investigashon, a determiná ku tabata trata di un akto di sabotahe, a lo ménos si mester bai tras di deklarashonnan ku presidente komisario di UTS Anthony Godett a hasi siman pasá na radio. Miéntras tantu oposishon a pidi un reunion riba e kaso Curoil awe mainta. Nos tin mas detaye riba e petishon aki den nos edishon di awe.