WILLEMSTAD – E asesinato di un pareha ingles na Antigua/Barbuda ta un mal propaganda pa henter Karibe. Esei ta loke ekspertonan di turismo den Karibe e koinsidí awe, despues ku e hòmber di e pareha tambe a muri den fin di siman. E dama a muri anteriormente siman pasá durante loke ta pasa un atrako ku a tuma lugá na Antigua. E hòmber ku nan a hiba Gran Bretaña a muri djasabra último. Lo dera e pareha huntu den un servisio di despedida ku lo tuma lugá na e mesun misa kaminda nan a kasa tres siman pasá. E mesun hendenan ku tabata na nan kasamentu tres siman pasá, awor lo regresá e mesun misa pa atendé nan entiero.
Dr. Catherine Mullany, un médiko i su kasá Benjamin Mullany ku ta birando un siko-terapista, a muri durante di un atrako ku a tuma lugá den nan bùngalo di luna di miel na Antigua. Nan tur dos ta di e parti sùit di Wales na Gran Bretaña. Polis a detené un rastafari di Antigua, relashoná ku e kaso aki. Polis a bisa, ku e ta sospechoso prinsipal den e kaso, ounke amigu i famianan ta bisa ku no por ta. Scotland Yard a manda un delegashon spesial Antigua pa yuda den investigashon di e kaso. E mishon di Soctland Yard a haña un rabu sinembargo pasobra Gran Bretaña no ta rekonosé kastigu di morto. Antigua si tin kastigu di morto den su leinan i ta probabel, ku si haña e sospechoso kulpabel, ku e lo por haña kastigu di morto (ku pal’i horka) na Antigua.
Durante di e atrako ku a tuma lugá na Antigua siman pasá, Catherine a haña un herida di bala na su kabes i el a muri mesora. Su kasá a haña un herida di bala tambe na su kabes i a bai den koma. A warda algun dia promé ku a mand’é Gran Bretaña. Djasabra sinembargo dòkternan a konstatá ku no tin chèns mas pa su rekuperashon i nan a stòp e mashinnan di funshoná. Ya na Antigua dòkternan a konstatá ku su chènsnan pa rekuperá ta mínimo i básikamente e tabata klínikamente morto.
Polis na Antigua a bisa, ku a detené dos persona den e kaso aki. Un di nan ta un hòmber ku yama Clarence James konosí komo “Cloud”, un di e tipo di personanan ku semper bo ta haña kant’i awa na playanan di Karibe i ku ta ofresé turistanan tur tipo di servisio. E hòmber ta konosí komo un bendedó di mariwana. Prensa na Gran Bretaña a publiká su pòtrèt awe. Polis a interogá mas ku 30 persona den e kaso aki di kua Cloud ta esun ku mas nan tin interes den dje. Entre otro nan ta investigando unda Cloud tabata na momentu ku e kaso a tuma lugá. E kaso a tuma lugá 5or di mardugá e bùngalo luhoso na Coco’s Hotel. Amigunan di Cloud a bisa sinembargo, ku nan no ta kere ku e por ta enbolbí den e kaso aki komo ku e ta konosí komo un hende simpátiko. Nan ta kere ku mas bien, polis di e isla, preshoná pa opinion públiko lokal i internashonal, a detené un hende djis pa kita preshon for di e kaso. Ademas e mes tin un frei blanku ingles ku el a topa hustamente durante bishita di e dama aki na su isla. Un tim di 5 investigador a yega e isla, entre nan e eksperto tòp di investigashon di asesinato Keith Niven. Niven a bisa ku nan lo investigá tur aspekto pa solushoná e kaso aki.
Miéntras tantu e kaso a hinka Karibe kompleto den un lus negativo. Un eksperto di Antigua, bibá na Merka, a bisa ku Karibe no mester tuma e kaso aki masha leve. “Su reperkushon ta masha grandi. Ta mata turistanan rònt mundu. Pero ora mata un turista den Karibe e persepshon ta bira unu hopi grandi pa tur isla”, asina el a bisa.