WILLEMSTAD – Segun CAP, ta notabel ku e aña aki “airlift” (ku ta midi na e kantidat di stulnan den avion ku ta sali for di Kòrsou) a subi ku aproksimadamente 40% kompará ku e aña promé ku apertura di e terminal nobo. Durante e mesun periodo aki aeropuerto a konosé un kresementu similar di 40% den e kantidat di pasahero ku ta yega Kòrsou i esnan ku ta bai for di Kòrsou. E oumento aki a tuma lugá den tur e merkadonan grandi, pero ku un subida signifikativo den e merkado ulandes, di Sur Amérika, di Nòrt Amérika i di Karibe. E kantidat di avionnan ku ta sali for di Kòrsou a subi ku 56%. E tráfiko aéreo di Kòrsou su merkado ta konsistí di e siguiente destinashonnan: 28% pa Amsterdam, 23% pa e islanan ABC, 19% pa Venezuela, 14% pa Nòrt Amérika, 11% pa destinashonnan den Karibe i 5% pa otro destinashonnan den Sur i Sentro Amérika. Apesar ku Amsterdam ainda ta e merkado mas grandi di Kòrsou, kresiendo ku 7% kompará ku e aña anterior, tin otro merkadonan ku ta ekspandiendo kompará ku e aña anterior manera Venezuela ku 176%, Nòrt Amérika ku 15% i Sur i Sentro Amérika ku 33%. Desaroyo di e terminal nobo a inkluí tambe negoshinan nobo i fasilidat di benta di kuminda i bibida nobo pa pasaheronan i tambe pa públiko lokal. Den e terminal bieu e nogoshinan tabata bende aproksimadamente US$. 14.04 pa kada pasahero saliente i den e terminal nobo esaki a subi te na US$. 34.55 pa pasahero. E sifra aki ta representá un subida di 146%. E subida mas drástiko tabata di e negoshinan di kuminda i bibida ku a subi di aproksimadamente US$ 0.13 pa pasahero te na US$. 5.64 pa pasahero den e terminal nobo. E terminal nobo ta ofresé mas surtido i mas espasio pa aktividatnan komersial kompará ku e terminal bieu.
For di dia ku e terminal nobo a habri tabatin e siguiente desaroyonan positivo pa ku tráfiko aéreo:
• Amsterdam - un di tres aeroliñea i mas kapasidat di stul riba avion
• Atlanta – servisio nobo di Delta Airlines
• Aruba – oumento di kapasidat di stul riba e vuelonan
• Bogotá – servisio nobo ku DAE i Avianca a oumentá su vuelonan
• Bonaire – oumento di vuelo
• Caracas – vuelonan nobo ku DAE, oumento di vuelo di Aserca i Avior, pero pèrdida di vuelonan di Aeropostal
• Valencia – servisio nobo ku Avior i Inselair
• Manaus - servisio nobo anunsiá pa Inselair
• Maracaibo – servisio nobo anunsiá pa Inselair
• Medellin - servisio nobo anunsiá pa Inselair
• Miami – oumento di kapasidat riba avion, servisio nobo anunsiá pa Inselair, pèrdida di un vuelo di American durante e periodo ménos drùk
• Port of Spain – servisio nobo anunsiá pa LIAT i Inselair
• Sint Maarten – servisio nobo i kompetitivo anunsiá pa Inselair
• San Juan – servisio nobo anunsiá pa Inselair
E terminal nobo tin e kapasidat pa prosesá e oumento den tráfiko manera anunsiá dor di Inselair i otronan. Apesar di e echo ku algun aeroliña a anunsiá ku nan ta bai baha nan kantidat di vuelo pa Nòrt Amérika despues di e temporada di vakashon, tòg CAP ta optimista ku na final di 2008 lo bai tin un kresementu di 12% pa 13% den e servisio aéreo internashonal i 5% den e servisio aéreo pa e islanan ABC kompará ku 2007 debí na e rutanan nobo ku otro aeroliñanan manera Inselair ya a anunsiá di ta kuminsá bula e aña aki ainda.